Humb jetën në një aksident me motor në kryeqytet Jetnis Dollapi, i njohur si anëtar i TBA.
Policia informoi sot se tek ish-Klubi “Partizani”, shtetasi Jetnis Dollapi, rreth 28 vjeç, duke drejtuar motorrin, me targë TR 430 E, ka humbur drejtimin dhe është përplasur me muret anësore të rrugës.
“Drejtuesi i motorrit është dërguar në SQU, ku më vonë ka humbur jetën. Grupi hetimor po kryen veprimet për të përcaktuar shkakun e humbjes së kontrollit”, theksoi policia.
Viktima, Jetnis Dollapi ne vitin 2010 ka qenë i dyshuar si autori i të shtënave më armë vetëm pak metër larg godinës së Presidencës, tek Pallati i Kongreseve si pasojë e një sherri mes grupeve te muzikës rep.
Asokohe Dollapi akuzohej për veprat penale të “armëmbajtjes pa leje”, “kanosjes” dhe “prishjes së rendit dhe qetësisë publike”. Jetnis Dollapi u shoqërua nga policia ndersa ngjarja për të cilën ai u prangos ndodhi pas një sherri mes fansave të grupeve muzikore rrep OTR dhe TBA në bulevardin “Dëshmorët e Kombit”, në sheshim mes Presidencës dhe Pallatit të Kongresve.
Zënka, e ndodhur vetëm pak minuta përpara se në Pallatin e Kongreseve të niste një konkurs muzikor ku merrnin pjesë përfaqësues të të dy grupeve, u shoqërua me të shtëna arme zjarri. Sipas policisë pas zënkës mes të rinjve Jetnis Dollapi ka nxjerrë nga xhupi një armë automatike dhe e ka drejtuar nga “rivalët”. Arma është shkrehur disa herë, ndërkohë që nuk janë shënuar të lënduar.
Në vendngjarje janë gjendur menjëherë forcat e policisë, të cilat kanë ndaluar dhe shoqëruar shtetasin Dollapi. Në vendin e ngjarjes policia sekuestroi në cilësinë e provës materiale një automatik dhe dy gëzhoja.
