Ferizaj.31.10.2016. Të hënën është mbajtur mbledhja e njëmbëdhjete për këtë vit e Kuvendit të Komunës së Ferizajt, me c’rast janë diskutuar pika të shumta të rendit të ditës.
Me këtë rast kryesuesi i Kuvendit të Komunës, Faruk Guri ka prezantuar në mënyrë detaje të gjitha pikat e rendit të ditës që ishin përgatitur për këtë mbledhje.
Por në fillim të mbledhjes së Kuvendit të Ferizajt, kryetari i Komunës, Muharrem Svarqa, përkrahu futjen në rend dite të dy propozimeve të anëtarëve të Komitetit për politikë dhe financa. U shpreh pro ndarjes së një parcele për ngritjen e shtatores së heroinës së kombit, Hyrë Emini si dhe i gatshëm të veprojë në bazë të vendimeve që nxjerr Kuvendi për fabrikën e riciklimit të gomave në fshatin Mirosalë, për të cilën tha se po vepron në ilegalitet duke dëmtuar shëndetin e qytetarëve.
Më pastaj Kuvendi komunal i Ferizajt miratoi draft strategjinë për informim dhe komunikim të komunës për periudhën 2016 – 2018, ndryshimet e propozuara nga INPO dhe dy propozimet e medieve për implementimin e politikave preferenciale ndaj operatorëve kabllorë. Përfaqësuesi i transmetuesve të licencuar televizivë të Ferizajt, Visar Hoti propozoi që qeveria e Ferizajt të nis realizimin e këtyre politikave ndaj operatorëve kabllorë, për të futur televizionet lokale me pozicionim numerik nga 3 deri në 10.
Grupet kuvendore përkrahën fuqishëm këtë kërkesë të transmetuesve televizivë të Ferizajt, duke e votuar të gjithë njëzëri.
Në punimet e kësaj seance, Kuvendi komunal i Ferizajt diskutoi dhe miratoi edhe ndryshimet e draftstatutit të Qendrës kryesore të Mjekësisë familjare në Ferizaj, mori vendim për shpalljen në interes të përgjithshëm të dy ngastrave kadastrale njërën në fshatin Pleshinë dhe njërën ne Ferizaj.
U more vendim po ashtu që të bëhet shpërndarja e druvë të zjarrit për familjet skamnore, vendim për shfuqizimin e vendimit 01. Nr 22 të datës 25.07. 2008 të Kuvendit të Komunës.
Po ashtu u morr vendim edhe për plotësimin e këshillit komunal për siguri në bashkësi, si dhe u dha një informate e detajuar lidhur me raportin financiar janar-shtator të këtij viti.
