Ferizaj

Jetullah Sylejmani fitues i çmimit “Ditët e Kulturës-2019” në Ferizaj


Publikuar më:


Pas shumë sukseseve në nivelin kombëtar dhe ndërkombëtar vepra e artistit Jetullah Sylejmani u vlerësua për herë të parë edhe në qytetin e tij në Ferizaj me Çmimin “Ditët e Kulturës – 2019” në Ekspozitën tradicionale “Ditët e Kulturës” e organizuar nga SHAF “Zef Kolombi” dhe Galeria e Arteve – Ferizaj.
Ndarjen e çmimit dhe hapjen zyrtare të ekspozitës e bëri drejtoresha për Kulturë, Rini dhe Sport, Xhemile Murati – Shabani.
Në këtë ekspozitë morën pjesë rreth 30 artistë me punime në mediume të ndryshme artistike si vizatim, pikturë, skulpturë, Grafikë, Karikaturë, Instalacion, art Konceptual, Fotografi etj.
Punimet e artistëve për nga përmbajtja e tyre konceptuale dhe artistike u vlerësuan nga ana e jurisë në përbërje prej Prof. Burim Ukiçi (kryetar i jurisë), Prof. Zenun Sherifi (anëtar) dhe Laura Brahimi (anëtare), ndërsa si Kurator i ekspozitës ishte Ilmi Sadiku. Në këtë edicion të kësaj ekspozite Galeria e Arteve ndau mirënjohje për artistin Emin Hasani për punën dhe kontributin e dhënë ndër vite në artin pamor në Ferizaj.

Jetullah Sylejmani ka ekspozuar dhe prezantuar punën në ekspozitat dhe institucionet më të rëndësishme kombëtare dhe ndërkombëtare si Galeria Kombëtare e Kosovës, Galeria Kombëtare e Maqedonisë, Muzeu Kombëtar i Shqipërisë, Qendra për Art Bashkëkohor Stacion Prishtinë, Art House në Shkodër, Cittadelarte në Itali, Galeria Art-Villamagna në Francë, Galleria Arte Maggiore “ICREATTIVI” RioneMonti në Romë – Itali, Ambasada Amerikane në Prishtinë, Ekspozitë në Zarë – Kroaci, Biblioteka Editrice Vaticana në Romë – Itali etj.
Ky çmim për artistin Jetullah Sylejmani vie pas disa sukseseve paraprake artistike, ku në të gjitha ngjarjet dhe ekspozitat artistike është vlerësuar nga juritë e pavarura, kredibile, profesionale e ndërkombëtare si:
Në vitin 2017 është përzgjedhur që ta përfaqësoj shtetin e Kosovës në Bienalen e Artistëve të Evropës dhe Mesdheut “Mediterranea” (Biennale des Jeunes Créateurs de l’Europe et de la Méditerranée) përzgjedhur nga kuratorja Maja Ćirić dhe Driant Zeneli.
Në vitin 2017 ishte finalist i ekspozitës bashkëkohore “Çmimi Artistët e së nesërmes” fondacioni (YVAA) Neë York dhe Ambasada Amerikane, Qendra për art Bashkëkohor STACION – Prishtinë, përzgjedhur nga juria ndërkombëtare Charles Esche, Erëmirë Krasniqi, Nataša Petrešin, Adrian Deva dhe Renaud Proch;
Në vitin 2017 për një periudhë dyjavore qëndroi në rezidencën për art bashkëkohor në Cittadelarte /Fondacioni Pistoletto – Biella të Italisë dhe Art House në Shkodër me mentor Adrian Paci.
Në vitin 2017 në edicionin e dytë të ekspozitës çmimi “AR” fitoi çmimin e dytë, nga juria ndërkombëtare Basak Senova dhe Ivan Moudov;
Në vitin 2017 ishte finalist i ekspozitës bashkëkohore “Artistët e rinj” edicioni i dytë – Galeria Kombëtare e Kosovës, përzgjedhur nga juria ndërkombëtare Başak Şenova, Ivan Moudov dhe Adem Rusinovci;
Në vitin 2017 ishte finalist i ekspozitës bashkëkohore “AR” edicioni i parë – ku ekspozoni në Galerinë Nacionale të Maqedonisë, përzgjedhur nga juria ndërkombëtare;
Në vitin 2016 ishte finalist i ekspozitës bashkëkohore “Artistët e rinj” edicioni i parë – Galeria Kombëtare e Kosovës, përzgjedhur nga juria ndërkombëtare Natacha Guibeau, Ibro Hasanovic, Leutrim Fishekqiu, Sislej Xhafa, Adrian Paci dhe Maksut Vezgishi;
Në vitin 2014 ishte finalist i ekspozitës bashkëkohore “Çmimi Artistët e së nesërmes” fondacioni (YVAA) Neë York dhe Ambasada Amerikane, Galeria Kombëtare e Kosovës, përzgjedhur nga juria ndërkombëtare Niels Van Tomme, Lucia Gavulová, Rozafa Basha, Thierry Bal, Slaven Tolj dhe Rudina Xhaferi.

 

To Top