Kompania e Ujësjellësit Rajonal “Prishtina” njofton konsumatorët e qytetit të Fushë Kosovës dhe fshatrave përreth, se sot gjatë orëve të pasdites është ndërprerë prodhimi i ujit të pijshëm në objektin Kroni – Kuzmin në Fushë Kosovë.
Sipas një komunikate sqaruese të kompanisë, duke filluar nga ora 16:00 e deri në mesnatë, qytetarët e kësaj komune do të kenë ndërprerje të furnizimit me ujë të pijshëm.
“Arsyet e ndërprerjes ndërlidhen me punimet e kompanisë Trainkos në linjën hekurudhore, ku përgjatë saldimit të binarëve, nga shkëndijat e zjarrit është djegur kabllo e energjisë elektrike 10 KW, që e furnizon direkt fabrikën e përpunimit të ujit në Kuzmin”, thuhet në njoftim.
Duke kërkuar mirëkuptimin e konsumatorëve të Fushë Kosovës, KUR ”Prishtina” thotë se ekipet janë në vendin e ngjarjes për sanimin e defektit. /KosovaPress/
