Përfaqësues nga Bashkitë Librazhd e Prrenjas si dhe fermerë të kësaj ane nisin bashkëpunimet me komunën e Ferizajt në fushën e bujqësisë.
Delegacionet nga dy komuna të Shqipërisë, Librazhd e Prrenjas si dhe fermerë e këshilltarë të bizneseve të atjeshme kanë qëndruar sot në komunën e Ferizajt për të shkëmbyer përvojat në fushën e bujqësisë . Ata u pritën këtu nga nënkryetari i komunës së Ferizajt, Xhavit Zariqi si dhe drejtori i bujqësisë Ismet Vranovci me ç’rast u njoftuan me zhvillimet e bujqësisë në komunën e Ferizajt.
“Ne si komunë jemi munduar që ta favorizojmë sektorin e bujqësisë dhe konsiderojë se është sektori i pari që mund të kontribuojë në zhvillimin ekonomik në komunën tonë”, është shprehur nënkryetari Xhavit Zariqi.
Nga ana tjetër nënkryetari i komunës së Librazhdit Enver Shputi dhe nënkryetari i Prrenjasit Nuri Belba, janë shprehur mirënjohës komunës sonë për mikpritjen e bërë. Ata thanë se këto takime janë shumë të rëndësishme për ta me vet faktin se shkëmbehen përvoja nga më të ndryshme sa i përket sektorëve më të rëndësishme të vendit.
Interesimet e fermerëve dhe këshilltarëve nga këto anë të Shqipërisë kishin të bënin me ndarjen e subvencioneve , kritereve për përfitime, dhe funksionimin e bizneseve te ngritura me përkrahjen e komunës.
Pas vizitave që u bënë në terren bashkë me delegacionet nga Librazhdi e Prrenjasi u vë ftesë zyrtare edhe për përfaqësuesit e komunës së Ferizajt që të zhvillojnë një vizitë të tillë në këto komuna me karakter njohjeje e bashkëpunimi.
