Por, megjithatë, sipas tyre, duhet të verifikohet nëse libra me përmbajtje të tillë shiten në tregjet e librave në Kosovë, në çfarë përmase, si dhe që ato të largohen, por edhe të hetohet prejardhja e tyre botuese.
Reagimi i autoriteteve qeveritare të vendit ka ardhur pak ditë pasi që presidenti i Kosovës, Hashim Thaçi, ka kërkuar nga organet kompetente që të fillojnë hetimet për shitjen e librave anti-semite në rrugët e kryeqytetit të Kosovës, si dhe largimin e tyre nga shitja.
Kërkesa e presidentit Thaçit u bë pas ankesës së dy ekspertëve të anti-semitizmit, shtetas izraelitë, Ido Daniel dhe Shimon Samuels, nga Qendra Simon Wiesental, të cilët i drejtuan një letër presidentit të Kosovës.
Siç është thënë në këtë letër, gjatë një vizite në Kosovë, Ido Daniel ka vërejtur në rrugët e Prishtinës shitjen e librave anti – semite.
Faton Abdullahu, zëdhënës i Qeverisë së Kosovës, duke folur për Radion Evropa e Lirë, thekson që ekzekutivi i vendit është kundër çfarëdo lloj anti semitizmi në Kosovë, duke u mbështetë edhe mbi parimet mbi të cilat është ndërtuar shteti i Kosovës, ligjet dhe kushtetutën e saj.
“Ne, apriori, jemi jo vetëm kundër, por jemi edhe të obliguar që në forma të ndryshme ta ndëshkojmë çfarëdo anti – semitizmi në Kosovë. Konsiderojmë që së pari do të duhej që të konstatohej gjendja dhe të vijmë te përfundimet e sakta sa i përket konkretisht ndonjë përmase, dimensioni, çfarë ka kjo lloj qasje në Kosovë dhe mandej të gjejmë forma adekuate, thjeshtë, për ta zbatuar ligjin”, thotë Abdullahu.
Agim Bërdynaj, zëvendësministër i Arsimit, Shkencës dhe Teknologjisë i Qeverisë së Kosovës, thotë për Radion Evropa e Lirë se kjo ministri e ka për obligim, por edhe është e kujdesshme që kurrikulat, rregullativat ligjore dhe çdo gjë që ka të bëjë me arsimin, tekstet shkollore dhe mjetet mësimore, t’i nënshtrohen parimeve që lënë jashtë ndikimet që nxisin urrejtjen.
“Megjithatë, ka indikacione. Kemi pasur raste kur ka depërtuar, qoftë ndonjë libër ose broshurë me ngarkesa fetare dhe të tjera. Ne jemi të kujdesshëm dhe çdo herë kur i kemi informacionet për këto, marrim masa. Ndërsa, sa u përket teksteve shkollore, që botohen në bazë të ligjit dhe kurrikulave të Kosovës, asnjë përmbajtje e kësaj natyre nuk është, për shkak se arsimin, me ligj dhe me Kushtetutë, e kemi laik”, thotë Bërdynaj.
Zëvendësministri Bërdynaj ka shtuar se edhe lëshimet, siç i ka quajtur, të pakta, teknike dhe në përmbajtje, në tekstet shkollore, janë rishikuar gjatë këtij viti nga Këshilli Shtetëror për tekstet shkollore dhe së shpejti fillon procesi i ri për botimin e teksteve.
Mirsad Krasniqi, shitës ambulant i librave në sheshin “Nëna Terezë” në Prishtinë, thotë për Radion Evropa e Lirë se kërkesën e presidentit Thaçi për heqjen nga shitja të librave anti-semite e kishte dëgjuar përmes medieve. Librat e tillë ai nuk i kishte në mesin e librave që i shiste.
“Çuditërisht, në njëfarë mënyre, u është bërë edhe reklamë. Tash kërkohen edhe më shumë. Ishte fjala për ‘Mein kampf’ apo ‘Lufta ime” e Hitlerit. Vjet është botuar edhe në Gjermani. Do të thotë, e ka kaluar atë kohë që është e paraparë se kur mund të botohej apo ribotohej. Tjetër, në bazë të leximit, ishte edhe një autor David Icke, ku edhe ai, në njëfarë mënyre, po e përshkruan shoqërinë izraelite. Shumica e librave te ne vijnë nga Shqipëria. Këto që unë i përmenda më parë janë botime të shtëpive botuese nga Shqipëria”, thotë ai.
Por, Krasniqi thotë se ka libra edhe nga Lindja e Mesme dhe largët, për të cilat nuk dihet nëse i janë nënshtruar ndonjë kriteri shkencor dhe editues nga botuesit.
“Në qoftë se janë të tilla që krijojnë urrejtjen, edhe unë jam për atë që atë që të largohen. Fundja, jemi në shekullin 21 dhe na duhen mirëkuptimi dhe toleranca. Na duhet bashkëpunimi dhe jo ndarja”, thotë Krasniqi.
Zëdhënësi i ekzekutivit, Abdullahu, thekson se inspektoratet dhe mekanizmat e shtetit, në përgjithësi, duhet t’i qasen kërkesës së presidentit Thaçi për mënjanimin e librave, për të cilat kontaktohet se kanë përmbajtje anti-semite. Ai thekson se shqiptarët, jo vetëm të Kosovës, kanë traditë të shkëlqyeshme sa i përket mendësisë me të cilën i qasen kulturës hebraike, në përgjithësi.
“Ndoshta nuk është e tepërt ta them që çfarëdo që kemi bërë ne, në historinë tonë, si popull, asnjëherë nuk na është dashur, në asnjë variant, që të jemi anti-semitë, për të fituar diçka në të mirë të pavarësisë së Shqipërisë apo të Kosovës”, shprehet Abdullahu.
Në anën tjetër, zëvendësministri Bërdynaj ka theksuar se problem për kontrollimin dhe rishikimin e teksteve mësimore lidhur me përmbajtjen e tyre paraqitet vetëm në rastin e teksteve shkollore, me të cilat mësojnë nxënësit serbë në shkollat në Kosovë.
Kjo, sipas tij, për faktin se ata mësojnë sipas plan-programeve mësimore të Republikës së Serbisë, e po ashtu edhe me tekste të botuara në këtë vend fqinj. Ndonëse është paraparë që tekstet e tilla të miratohen nga komisionet që nxjerrë Ministria e Arsimit e Kosovës, kjo nuk ka ndodhur deri më tash, për shkak të rrethanave politike, që ndërlidhen me komunitetin serb në Kosovë. (REL)
.
