Specialisti i kirurgjisë në Klinikën e Urologjisë në QKUK, Fahredin Veseli është suspenduar nga vendi i tij i punës, për shkak të neglizhencës së orarit të punës nga ana e tij.
Suspendimi i tij ka ardhur për shkak se gjatë inspektimit nuk është gjetur në vendin e punës
Lajmin për Telegrafin e ka konfirmuar zyra e drejtorit të SHSKUK-së, Basri Sejdiu.
“Zyra e drejtorit të përgjithshëm e SHSKUK, ju konfirmon se dr. Fahredin Veselaj, specialist i urologjisë është larguar përkohësisht nga puna, meqë me datë 11.09.2018, drejtori i përgjithshëm i SHSKUK, dr. Basri Sejdiu, gjatë inspektimit në kujdestari, kishte konstatuar se, edhe pse figuronte kujdestar, i njëjti nuk ndodhej në vendin e punës. Lënda është proceduar në komisionin disiplinor i cili do të marrë vendim”, thuhet në përgjigjen e tyre.
Telegrafi ka mësuar se kirurgu Veseli është suspenduar për gjashtë muaj. Po ashtu Telegrafi ka provuar të kontaktoi edhe me kirurgun Fahredin Veseli, mirëpo i njëjti nuk është përgjigjur.
