Paraditen e sotme, drejtori i Drejtorisë së Pronës, Gjeodezisë dhe Kadastrit, Sabri Murseli mbajti konferencën e fundvitit për media, me ç’rast paraqiti një bilanc të punës në këtë drejtori.
Nga të dhënat që prezantoi drejtori Murseli, vuri theksin tek sipërfaqja e tokës rreth 1.5 hektarëshe që qytetarët i kanë kaluar në pronësi Komunës, për të mundësuar zhvillimin e projekteve të ndryshme infrastrukturore. Gjithashtu, drejtori Murseli tha se gjatë këtij viti, janë pranuar rreth 13 mijë kërkesa nga qytetarët, të cilat janë trajtuar me profesionalizëm dhe përkushtim maksimal.
Drejtori i Pronës, Gjeodezisë dhe Kadastrit, Sabri Murseli theksoi gjithashtu se gjatë këtij viti , ka pasur një volum të shtuar të kërkesave të qytetarëve, për regjistrimin e pronësisë, përkatësisht regjistrimin e pronësisë në emër të dy bashkëshortëve, gjë që flet mjaft për vetëdijen qytetare ferizajase që t’i rregullojnë çështjet pronësore-juridike dhe interesimin e tyre për të regjistruar pronën në emër të dy bashkëshortëve apo në emër të përbashkët. Kjo ka bërë që Komuna e Ferizajt, të jetë lidere në rang vendi, sa i përket numrit të regjistrimit të pronës në emër të dy bashkëshortëve.
