Ferizaj– Me këtë rast pushteti lokal premtoi edhe asfaltimin e më shumë se 30 rrugicave në pjesë të ndryshme të Ferizajt.
Rruga ” Enver Hadri” e cila lidh rrugët “Astrit Bytyqi” dhe “Rexhep Bislimi” ka filluar të rregullohet këto ditë dhe për pak kohë do të jetë edhe e asfaltuar. Ajo është e gjatë mbi 400 metra dhe buxhetit të komunës do t’i kushtojë mbi 46 mijë euro. Kryetari i komunës së Ferizajt Muharrem Svarqa u zotua me këtë rast ky rregullim i rrugës do t’i prijë edhe asfaltimit të më shumë se 30 rrugicave në pjesë të ndryshme të qytetit. Shtruarja e rrugëve me zhavorr po tregohet joefikase, prandaj asfaltimi po shihet si zgjidhje më e qëndrueshme.
“Kjo rrugë do t’ju parapri edhe investimeve tjera në një sipërfaqe prej 30 rrugicave të rëndësishme të qytetit në të gjitha anët e qytetit për të kulmuar më vonë edhe me fillimin të realizimit të projektit për qendrën e qytetit, dhe pas studimit të fizibilitetit do të ketë një fillim të mbarë edhe të rregullimit të parkingjeve nëntokësore ku komuna jonë ka nevoje për to”, ka thënë kryetari Svarqa.
Edhe drejtori për Infrastrukturë Gaurr Ilazi flet për kërkesa të ndryshme që i adresojnë tek ai banorët e lagjeve të ndryshme .
“Ka shumë rrugica të pa asfaltuara dhe duhet të asfaltohen. Ne tash për tash jemi duke bërë edhe rregullimin e shumë rrugicave nëpër rrugë të ndryshme të qytetit”, ka thënë Ilazi.
Ndërkaq banorët e kësaj rruge tregojnë se kishin vështërsi të ndryshme me ujë me baltë qe një kohë të gjatë. Falënderojnë komunën për angazhimin e treguar edhe në vendbanimin e tyre.
Për vitin 2016 komuna e Ferizaj po planifikon t’i realizojë mbi 96 projekte në vlerë rreth 7 milionë euro. Por si projekti më i rëndësishëm konsiderohet asfaltimi dhe rregullimi i rrugës nga fshati Babush deri në Koshare i cili lidh dy magjistrale dhe ka koston mbi 3 milionë euro. Ky projekt do të financohet nga Ministria e Infrastrukturës sikurse edhe 5 projekte të tjera në të cilat pritet të fillojnë së shpejti të punohet.
