Ministria e Infrastrukturës përmes një komunikate për media bën të ditur se sot ka nisur asfaltimi i segmentit të rrugës Prelez i Jerlive – Ferizaj, pjesë e rrugës nacionale N2, Prishtinë -Ferizaj.
Ky segment rrugor tejet i frekuentuar po asfaltohet në kuadër të mirëmbajtjes së rrugëve dhe ka gjatësi mbi 1 kilometër, kurse gjerësia e saj është 7.5 metra, transmeton Koha.net.
Zëvendësministri i MI-së, Rexhep Kadriu, nga kompania e mirëmbajtjes ka kërkuar që krahas cilësisë, të jenë të shpejtë dhe efikas, në mënyrë që të evitohen kolonat e gjata në trafik.
Ministria e Infrastrukturës thotë se në vazhdimësi është duke ndërhyrë në rrugët ekzistuese të cilat janë të dëmtuara, në mënyrë që qytetarëve t’u ofrohet infrastrukturë moderne dhe më e sigurt.
