Ministri i Brendshëm serb, Nebojsha Stefanoviq, ka deklaruar sot se ai do t’i bëjë thirrje Asamblesë së Përgjithshme të Interpolit që Kosova mos të anëtarësohet në këtë organizatë.
Ai në një konferencë për media gjatë ditës së sotme ka thënë se i ka dorëzuar kreut të INTERPOL-it, Meng Hongwei, fakte me shkrim se pse sipas tij Kosova nuk duhet të anëtarësohet në këtë organizatë, transmeton lajmi.net.
Siç thotë Stefanoviq, një shtet mund të bëhet pjesë e INTERPOL-it vetëm nëse është anëtar i OKB-së.
Aplikacioni për anëtarësim i Kosovës është përfshirë në draftin e axhendës së përkohshme të sesionit të 87 të Asamblesë së Përgjithshme të Interpolit, i cili sipas njoftimeve të mëparshme mbahet në Emiratet e Bashkuara Arabe në nëntor.
