Nisma e ndërmarrë nga tifozeria “Ujqit” dhe e mbështetur nga Komuna e Ferizajt, për grumbullimin e artikujve ushqimor e veshmbathjeve ndihmë qytetarëve të Shqipërisë të goditur nga tërmeti i ditës së sotme, për pak orë qëndrimi në shesh, arriti të grumbulloj qindra pako me ushqime, veshmbathje e materiale të nevojshme për t’i dërguar tek banorët në nevojë në Shqipëri.
Për pak minuta, niset kontigjenti i parë i kësaj ndihme që do të vazhdoj edhe ditëve në vijim. Veshmbathjet, ushqimet e materialet e tjera të nevojshme për përballimin e kësaj situate do të nisen menjëherë nën mbikqyrjen e përcjelljen e zyrtarëve komunale drejt zonave të prekura nga tërmeti në Shqipëri.
Ferizajasit edhe kësaj radhe dëshmuan solidaritetin e madh që kanë, shpirtin bujar e bashkëndjenjën me bashkëatdhetarët në Republikën e Shqipërisë. Aksioni do të vazhdoj edhe ditëve të ardhshme ku është shfaqur interesim i jashtëzakonshëm i qytetarëve për të ndihmuar në këtë nismë.
