Ferizaj.12.09.2018. Familja Karaliti nga Zllatari bëhet me shtëpi të re falë iniciativës së Kryetarit të Komunës, Agim Aliu dhe donatorëve privat.
Familja 6 anëtarëshe e Shaban Karalitit, deri më sot ka jetuar në këtë shtëpi të vjetër e të ngushtë pa kushte elementare.
Por me angazhimin personal të Kryetarit të Komunës së Ferizajt, Agim Aliu dhe mjetet e siguruara nga donatorë privat, tani e tutje edhe kjo familje do ta bëjë jetën në një shtëpi të re e më të rehatshme.
Kryefamiljari Shaban Karaliti dhe bashkëshortja e tij Xhylnazja, thonë se jetojnë vetëm me një ndihmë sociale dhe vet nuk do të mund ta bënin asnjëherë këtë strehë të re për fëmijët e tyre.
“Shumë faleminderit prej kryetarit dhe të gjithë atyre që janë mundu me naj bë shtëpinë e re, se keq i kena pas kushtet tepër” tha kryefamiljari Karaliti me rastin e hyrjes në shtëpinë e re.
Familjen Karaliti me rastin e hyrjes në shtëpinë e re e ka vizituar edhe Kryetari i Komunës së Ferizajt Agim Aliu me ç’ rast ka uruar të gjitha të mirat për një jetë më të mirë në kushte komode duke premtuar se mbështetja për këto familje nuk do të mungojë asnjëherë.
Ndërkaq bashkëfshatari Isa Bajrami tregoi se iniciativa për ndërtimin e shtëpisë për këtë familje me kushte jo të mira ekomomike ishte nisur kohë më parë, por tani u fuqizua me shumë edhe më mbështetjen e zyrtarëve komunal.
Ata pohojnë se bashkë me kontributin edhe të disa donatorëve vlera e ndërtimit të kësaj shtëpie është mbi 20 mijë euro.
