Në orët e hershme të mëngjesit të sotëm, Kryetari i Ferizajt, Agim Aliu mblodhi Shtabin Emergjent për përballimin e situatës me virusin Covid -19. Nga vlerësimet e profesionistëve shëndetësor, Ferizaj vijon të mos ketë asnjë rast të konfirmuar me CoronaVirus, ndonëse mobilizimi i stafit shëndetësor është i jashtëzakonshëm e i shtuar për këtë situatë.
Nga vlerësimet e gjendjes me shërbimet tona shëndetësore, nga anëtarët e Shtabit Emergjent u konstatua dhe u morën këto vendime:
- Objekti i Emergjencës Primare, pranë QKMF-së dedikohet plotësisht për rastet e dyshuara me CoronaVirus. Udhëzohen qytetarët ferizajas me simptoma të këtij virusi të drejtohen drejtpërdrejt në Emergjencën Primare dhe jo në pikat tjera shëndetësore;
- Formohet Ekipi Lëvizës i Intervenimit në përbërje të mjekëve e infermierëve nga QKMF dhe Spitali i Përgjithshëm i Ferizajt, me qëllim parandalimin e përhapjes së qarkullimit të rasteve të dyshuara në zona e hapësira publike;
- Riorganizohet orari i punës së stafit shëndetësor për të mbuluar të gjitha shërbimet për këtë situatë si dhe sëmundshmëritë tjera të pacientëve;
- Institucioneve private e subjekteve afariste private i kërkohet të marrin masa mbrojtëse dhe të reduktojnë esencialisht ekspozimin ndaj kësaj viroze.
Shtabit Emergjent me vendim unanim iu shtuan edhe dy anëtarë, drejtori i Drejtorisë së Shërbimeve Publike dhe Emergjencë, Arben Halili dhe Komandanti i Stacionit Policor në Ferizaj, Imer Kaqara.
Nga qytetarët kërkohet t’i shmangin lëvizjet e panevojshme, të marrin masat mbrojtëse si dhe të ruajnë qetësinë publike, kurse rastet e dyshuara të vetizolohen dhe të kërkojnë asistencë profesionale shëndetësore.
