Deputeti Elmi Reçica, pas votimit të buxhetit të republikës së Kosovës për vitin 2021 ka shkruar se PDK ka tejkaluar vetvetën dhe për të mirën e qytetarëve ka qenë pro aprovimit të buxhetit pavarësisht së është në opozitë. Kjo është hera e dytë që PDK, edhe pse në opozitë ka votuar projekte në të mirë të qytetarëve. Para kësaj , ishte PDK që mundësoj votimin e 10 % të trustit dhe pakos së rimëkëmbjes.
Kjo është deklarata e plotë e deputetit Elmi Reçica
Partia Demokratike e Kosovës në seancën e sotme të jashtëzakonshme të Kuvendit të Kosovës ka votuar në lexim të parë projektligjin për buxhetin e Republikës së Kosovës për vitin 2021, ashtu siç edhe kemi deklaruar dhe njoftuar opinionin ditë më parë se PDK-ja do të voton pro buxhetit.
Vota e PDK-së për buxhetin e Republikës së Kosovës për vitin 2021, njëherit është votë për ruajtjen e sigurisë kombëtare, votë për të gjitha kategoritë qytetare dhe shtresat sociale që varen prej buxhetit të shtetit, në mënyrë që vendi të mos jetë i kërcënuar në kuptimin e sigurisë kombëtare për shkak të mungesës së buxhetit dhe të shmangim momentet e një krize të plotë ekonomike dhe financiare, ku qytetarët e Republikës së Kosovës do të mund të mbesnin pa paga dhe pa pensione për shkak të mungesës së buxhetit. Dy qeveritë e fundit, Kurti dhe Hoti, me qeverisjen e tyre e rënduan vendin dhe e thelluan në krizë politike dhe ekonomike. E përkeqësuan vendin në të gjitha fushat.
PDK-ja është parti që merr vendime të mëdha, gjithmonë në përputhje me parimin tonë se jemi opozitë ndaj pushtetit por asnjëherë ndaj shtetit dhe qytetarëve, si forcë e tillë prijetare politike në vend zotohemi se do të përkushtohemi dhe do të punojmë edhe më shumë në ruajtjen, forcimin dhe konsolidimin e shtetit tonë, ka shkruar deputeti Elmi Reçica.
