Mëngjesin e sotëm, i pari i Komunës së Ferizajt, Agim Aliu shoqëruar edhe nga drejtori i Drejtorisë së Bujqësisë dhe Pylltarisë, Burim Bajrami, pritën në vizitë, ministrin e Bujqësisë, Besian Mustafa si dhe drejtues e zyrtarë të tjerë të kësaj ministrie.
Kryetari Aliu njoftoi ministrin Mustafa për investimet që po kryhen në Ferizaj në fushën e bujqësisë, duke theksuar se janë mbi 1.3 milionë euro që qeverisja aktuale lokale ka investuar përmes subvencionimit të bujqve e fermerëve ferizajas.
“E vlerësoj shumë vizitën e zotit Mustafa në Ferizaj për faktin se ishte një vizitë e munguar, ka kohë që ministra të bujqësisë nuk kanë qenë në Ferizaj, prandaj kjo e bën më të veçantë vizitën e ministrit Mustafa në Ferizaj. Por më shumë sesa vizita është kjo që ne po i vizitojmë fermerët e suksesshëm të Komunës së Ferizajt, sigurisht se në radhë të parë duhet përgëzuar fermerët me gjithë sakrificën dhe mundin e tyre janë bërë të suksesshëm e sot ne na prezantojnë me produktet e tyre kudo në Europë por edhe në botë. Sigurisht se pashmangshmërisht ne kemi qenë e jemi të detyruar që vazhdueshëm t’i mbështesim këta fermerë, prandaj jam i lumtur që sot jemi tek një biznes, tek një fermer që është storie e suksesit e ku ne e kemi një hise të vogël në këtë storie të suksesit sepse e kemi mbështetur vazhdueshëm, por sot jemi për t’i thënë se do të vazhdojmë t’i mbështesim fermerët e tillë çfarë është kompania këtu, por edhe fermerët e tjerë. Komuna e Ferizajt tashmë ka lartësuar edhe më shumë sasinë mbështetëse të buxhetit ku tashmë jemi në parametrat e mbi 1 milionë e 300 mijë euro si Komunë e Ferizajt që kemi mbështetur fermerët e Komunës së Ferizajt” tha mes tjerash kryetari Aliu.
Në anën tjetër, ministri i Bujqësisë, Besian Mustafa, duke përgëzuar qeverisjen lokale për fokusin që ka për bujqësinë në Ferizaj tha se mbështetja nuk do të mungoj edhe nga niveli qendror për bujqit e fermerët ferizajas, duke vënë theksin tek vendimi që ka marr Ministria e Bujqësisë për subvencionimin e dyfishtë apo pagesën dy herë për bujqit e fermerët përfitues si masë mbështetëse për tejkalimin e sfidave të këtij viti për bujqësinë.
“Është nder i veçantë të jem prezent sot në Komunën e Ferizajt, një ndër komunat më të mëdha në aspektin ekonomik dhe duke pasur parasysh që bujqësia është ndër sektorët më të rëndêsishëm për të mos thënë më i rëndësishmi i ekonomisë, është nder i veçantë të jem në Ferizaj për të parë nga afër edhe punën e Komunës por mbi të gjitha edhe punën e fermerëve, bujqve e blegtorëve të kësaj komune, të cilët me forca vetanake dhe përkrahjen e Ministrisë së Bujqësisë dhe Komunës së Ferizajt po zhvillojnë aktivitetin e tyre bujqësor, duke ndikuar në rritjen ekonomike dhe mbi të gjitha në rritjen e punësimit në nivel komunal dhe nivel vendi. Përveç kësaj erdha të njoftoj bujqit, blegtorët dhe fermerët e këtij regjioni, kësaj komune që Ministria e Bujqësisë, sivjet do të paguaj subvencionet dy herë, pra dyfish. Fillimisht do të përfundohet pagesa e rregullt e të gjitha subvencioneve për të gjithë bujqit, për të pasur një sistem fer për të gjithë e pastaj do të kthehemi dhe do të bëjmë pagesën e dytë të subvencioneve, pra dy herë subvencione sivjet që t’i përkrahim bujqit tonë që të tejkalojnë këtë vit mjaft sfidues për bujqësinë” tha ministri Mustafa.
Në vizitën e tij, Kryetari i Komunës, Agim Aliu bashkë me ministrin e Bujqësisë, Besian Mustafa, zëvendësministra, deputetë e zyrtarë lokal e qendror, vizituan edhe disa nga ndërmarrjet bujqësore si pika grumbulluese e pemëve të imëta “Besiana G” në Prelez të Muhaxherëve, ndërmarrjen “Agropharma” që merret me blegtori, lavërtari dhe përpunim të qumështit, fermën dhe veprimtarinë e kompanisë “Vegonature”, për të vijuar me vizitën e ministrit Mustafa në plantacionin e kumbullave në Dardani dhe fermën e dhenëve në Varosh.
