Banorët e fshatit Nikaj të komunës së Kaçanikut të enjten kanë protestuar në shenje pakënaqësie shkaku që “Bechtel-Enka” gjatë punimeve të trasesë në autostradën “Arbër Xhaferi” ia ka bllokuar rrugën e fshatit.
Ky fshat është ndarë në dy pjesë ndërkohë banorët po kërkojnë ndërtimin e një nënkalimi ashtu siç thonë se kanë marrë premtime. Kjo protestë ka përfunduar me gjashtë persona të arrestuar. Në mbështetje të banorëve ka dalë edhe kryetari i komunës Besim Ilazi i cili ka thënë se kanë marrë premtime për hapjen e një rruge alternative, mirëpo nuk është realizuar ende.
Ndërkaq Hekuran Guri, banor nga fshati Nikaj, ka thënë se Policia e kanë arrestuar dhe ia kanë shqiptuar një gjobë mandatore, mirëpo ai bën me dije se do të vazhdojnë me protesta derisa të hapet rruga alternative e fshatit, raporton Koha Ditore.
“Fshati është ndarë në dy pjesë ndërkohë fëmijët duhet të udhëtojnë mbi 6 kilometra për të shkuar në shkollë. Gjithashtu gjysma e familje më ka mbetur në pjesën tjetër të autostradës. Është mbyll rruga e vjetër dhe nuk është bërë zgjidhja alternative”, ka thënë ai.
Edhe Policia e Kosovës nëpërmjet një komunikate ka thënë se rreth 30 banorët kanë protestuar në shenjë pakënaqësie shkaku i mos hapjes së një rruge alternative.
“Edhe pse policia i ka informuar dhe urdhëruar protestuesit që të mos pengojnë punimet dhe të largohen, të njëjtit nuk i kanë zbatuar urdhrat. Me këtë rast, policia i ka arrestuar dhe sjell në stacionin policor gjashtë persona të cilët nuk i kishin zbatuar urdhrat e ligjshëm. Lidhur me këtë, është njoftuar prokurori kujdestar, i cili ua ka shqiptuar gjobat mandatare (tiketë) gjashtë personave dhe të njëjtit janë liruar. Bëhet e ditur se protestuesit tjerë janë shpërndarë dhe se punimet në autostradë kanë vazhduar pa ndonjë pengesë”, thuhet më tej në njoftim të Policisë së Kosovës.
