Donacion i madh në pajisje për personat me nevoja të veçanta, arrin tek Shoqata “Hendifer”, kontigjenti me vlerë 25,000 euro.
Si rezultat i bashkëpunimit mes Komunës së Ferizajt dhe Shoqatës së Personave me Nevoja të Veçanta “Hendifer” në Ferizaj, personat me nevoja të veçanta në Ferizaj arritën të përfitojnë donacion në pajisje e teknikë nga Gjermania në vlerën 25,000 euro. 122 karroca për invalidë, 12 bicikleta për invalidë dhe 6 shtretër donacion nga “Selaam” përmes Shoqatës së Personave me Nevoja të Veçanta “Hendifer” do të shpërndahen tek qytetarët në nevojë në komunën e Ferizajt.
Kryetari i Ferizajt, Agim Aliu me këtë rast përveç asistencës së ofruar në transportin dhe procedurat tjera të pranimit të donacionit, ka siguruar edhe depon ku janë të vendosura këto pajisje. Edhe drejtuesit e shoqatës “Hendifer” të kënaqur me këtë mbështetje, këtë donacion, thanë se kjo ndihmë është mëse e nevojshme për qindra qytetarë me nevoja të veçanta dhe se do të zgjidh shumë kërkesa të komunitetit.
