Lajmi për vdekjen e veteranit, invalidit dhe ushtarit të Ushtrisë Çlirimtare të Kosovës, Muharrem Hazrollaj, ka pikëlluar të gjithë, shokët, bashkëluftëtarët e veprimtarët e çështjes kombëtare.
Me këtë rast edhe Kryetari i Ferizajt, Agim Aliu i dërgoi telegram ngushëllimi familjes Hazrollaj.
“Shumë e nderuara familje Hazrollaj! Me pikëllim të madh morëm lajmin se nga kjo botë iku luftëtari, veterani, invalidi i Ushtrisë Çlirimtare të Kosovës dhe kryetari për shumë vite i Shoqatës së Invalidëve të Luftës së UÇK-së në Ferizaj, Muharrem Hazrollaj. Me të ndamë momentet më të mira, vullnetin më të hekurt dhe bindjen më të pastër të të ardhmes që buroi nga lufta e lavdishme çlirimtare. Ngushëllime, ju, miqve e bashkëluftëtarëve. I qoftë i lehtë dheu i Kosovës” tha në telegramin e ngushëllimit, Kryetari i Ferizajt, Agim Aliu
Edhe ish eprori i lartë i UÇK-së dhe deputeti Elmi Reçica i ka dërguar telegram ngushëllimi familjes Hazrolli.
“Me dhimbje mora lajmin për ndarjen nga jeta e mësimdhënësit, luftëtarit dhe invalidit të Ushtrisë Çlirimtare të Kosovës, Muharrem Hazrollaj.Ngushëllime familjes, miqve, bashkëluftëtarëve, kolegëve dhe gjithë të afërmëve të tij!U prehsh në paqe!” ka shkruar në telegram ngushëllimi ish eprori i kartë i UÇK-së dhe deputeti Elmi Reçica.
Edhe OVL e UÇK-së dega në Ferizaj ka ngushëlluar familjen Hazrollaj
Të nderuar bashkëqytetarë, familjarë të Dëshmorëve të Kombit, Invalidë dhe Veteranë të UÇK-së, Ju njoftojmë se sot ka ndërruar jetë veterani/invalid i Ushtrisë Çlirimtare të Kosovës, MUHARREM HAZROLLAJ, për shumë vite ish Kryetar i Shoqatës së Invalidëve të Luftës së UÇK-së – dega Ferizaj.
Varrimi i të ndjerit bëhet nesër 01.08.2019 – ora 15:00, në Kompleksin e Varrezave të Dëshmorëve dhe Veteranëve në Grykën e Caralevës.
Në nderim të bashkëluftëtarit, sot, 01.08.2019 – ora 11:00, organizohet akademi mortore, akademia mbahet në teatrin e qytetit të Ferizajt.
Ngushëllime gjithë bashkëluftëtarëve, ngushëllime familjes Hazrollaj!
