Deputeti i Partisë Socialdemokrate, Faton Topalli, ka thënë se dy partitë e mëdha opozitare, Lidhja Demokratike e Kosovës dhe Lëvizja Vetëvendosje, janë duke e mbajtur të gjallë Qeverinë Haradinaj.
Ai këto komente i ka bërë në emisionin Sytë 7 në Klan Kosova, duke shtuar se PSD-ja është subjekti i parë politik që i ka mbledhur nënshkrimet për ta rrëzuar Qeverinë aktuale, mirëpo sipas tij ato nënshkrime kanë përfunduar në sirtarët e LDK-së.
“Nëse dikush është duke e mbajtur Qeverinë Haradinaj në pushtet, janë pikërisht dy partitë e mëdha opozitare të cilat me mosbashkëpunimin e tyre po ia zgjasin jetën kësaj Qeverie”.
“PSD-ja është subjekti i parë që i ka mbledhur nënshkrimet për ta rrëzuar këtë Qeveri. Ne jemi edhe sot të gatshëm që ta bëjmë këtë, por nuk i kemi numrat”.
“Mirëpo ne e praktikojmë një politikë e cila nuk është shkatërrimtare. Me presionin e PSD-së ne kemi arritur që ta detyrojmë Qeverinë që ta miratojë ligjin për paga, i cili është zvarritur për vite me radhë”.
“Tjetra është se tani jemi duke u marrë me sektorin privat ku mendoj se do të ketë një ngritje të pagës. Për ne kjo është një temë shumë e rëndësishme sepse prek një numër të madh të qytetarëve”.
“Pastaj lufta kundër korrupsionit është gjithashtu një temë e rëndësishme të cilën ne jemi duke e shtyrë përpara. Është deputetja Shqipe Pantina ajo e cila e ka propozuar vetingun”.
“Fillimisht është thënë se PSD-ja nuk do të mund ta kalojë një përqindëshin. Mirëpo vazhdimisht është dëshmuar se PSD-ja është parti në rritje dhe nuk ka mundësi që ne të mos jemi pjesë e zgjedhjeve të ardhshme”.
Deputeti i Partisë Socialdemokrate, Faton Topalli, ka thënë se Lëvizjes Vetëvendosje i është larguar motori i saj.
Ai këto komente i ka bërë në emisionin Sytë 7 në Klan Kosova, duke shtuar se në PSD është një grup i madh aktivistësh që kanë një përvojë të gjatë politike dhe sipas tij, kjo gjë e bën partinë më të fuqishme.
“Shënimi i njëvjetorit të PSD-së, në fakt është një ditë e veçantë për qytetarët duke marrë parasysh faktin se një parti për një vit, ka arritur gjëra të mëdha. Edhe për PSD-në kjo është një ditë e veçantë sepse ne tani bëjmë një bilanc se çfarë kemi punuar për një vit. Natyrisht se jemi krenarë për atë se çfarë kemi arritur”.
“Prishtina dhe Kamenica janë dy komuna të suksesshme të udhëhequra nga PSD-ja të cilat e kanë dëshmuar se janë shumë transparente. Për shembull në Komunën e Prishtinës, prej 16 drejtorëve – shtatë prej tyre janë gra. Kjo shifër është edhe më e lartë në Kamenicë ku nga 11 drejtorë, gjashtë prej tyre janë gra”.
“Mendoj se kjo është një prej elementeve shumë të rëndësishme të Socialdemokracisë. USAID e ka shpallur komunën e Prishtinës si më transparenten në Kosovë”.
“Është e drejtë e opozitës që të bëjë kritika. Mirëpo mjerisht politika në Kosovë është se opozita përpiqet vazhdimisht që ta shkatërrojë pozitën. Ne si PSD, por edhe gjatë kohës në VV, për disa vite me radhë kemi folur për qeverisjen e mirë të Shpend Ahmetit në Prishtinë, dhe tani papritmas u bë qeverisje e keqe”.
“Jemi një grup i madh aktivistësh që kanë një përvojë të gjatë politike, në një far mënyrë, motori i VV-së ka kaluar në PSD. Kjo është ajo që e bën të fuqishme PSD-në”.
