Sot përsëri qytetarët u rikthehen rrugëve për të kundërshtuar vendimin e presidentit Ivanov për falje kolektive të personave që janë nën hetim të Prokurorisë Speciale Publike.
Nëpër rrugët e kryeqendrës vërehen forca të shtuara policore të cilat përgatiten për të mbajtur situatën nën kontroll.
“Deri në këto momente në rrugën që është paraparë të zhvillohen protesta të reja të cilat fillojnë sot në orën 18:00, qarkullimi rrugor i automjeteve është normal dhe akoma nuk është bllokuar rruga. Disa qytetarë mendojnë se kjo është një pengesë për qarkullimin e tyre, ndërsa të tjerët mendojnë se kjo është krejtësisht normale”.
“Nuk më pengon fare, unë jetoj këtu në Qendër dhe nuk më pengon. Mirë është që ka protesta, duhet të ndryshohet situate në shtet. Edhe unë protestoj çdo herë, dua të ardhme më të mirë për rininë”, tha një qytetar.
“Jo jo, ka të sëmurë, fëmijë të cilëve ju pengon, edhe mua personalisht më pengon, sepse tani duhet të bëj rrethore, jo aq shumë sot, por ditët tjera nuk mundesha të shkoj në shtëpi nga njerëzit”, u shpreh një qytetar tjetër.
Kjo është e gjashta ditë me radhë që po zhvillohen protesta në rrugët e Shkupit. Tash më janë inkuadruar edhe disa qytete të tjera në Maqedoni si Manastiri, Strumica, Velesi, ndërsa nga dita e sotme protestojnë edhe qytetarët nga Kumanova dhe Shtipi./Alsat
