Sindikata e Bashkuar e Arsimit Shkencës dhe Teknologjisë, i ka shkruar një letër publike kryeministrit të Kosovës Albin Kurti.
Nëpërmjet kësaj letre SBASHKi bën thirrje qeverisë që të sigurojë zbatimin e Ligjit të ri të pagave.
Sindikata e Bashkuar thotë që planifikimi për këtë ligj duhet të bëhet në buxhetin e vitit 2020.
Letra e plotë drejtuar kryeministrit Kurti:
Këshillë publike e SBASHK-ut drejtuar Kryeministrit Kurti dhe Qeverisë
Në Ligjin e Buxhetit për vitin 2020 planifikoni mjetet për Ligjin e pagave
Nëse Ministria për Financa nuk bën planifikime buxhetore për ligjin e pagave dhe Qeveria përkrah një ide të tillë, atëherë në tërë sistemin arsimor do të përsëritej situata e janarit të vitit të kaluar, gjegjësisht bazuar në kërkesat e anëtarësisë do të ketë veprime sindikale dhe grevë në nivel vendi nga çerdhet, institucionet e Arsimit Parauniversitar dhe në të gjitha Universitetet publike.
Ngatërrimet që ishin bërë pa qëllim mes Ligjit për zyrtarët publik dhe atij të Pagave te lajmi lidhur për zgjatjen e masës së pezullimit nga Kushtetuesja edhe për një muaj kishin krijuar tensione shtesë të gjithë anëtarësia e SBASHK-ut. Tensionet janë shtuar edhe më tepër nga lajmi i shpërndarë , që urojmë të mos jetë i saktë, se Ministria e Financave duke përgatitur Projektligjin e buxhetit për vitin 2020 nuk do të planifikojë fare mjete për implementimin e Ligjit të pagave .
SBASHK-u i drejtohet me këshillën publike Kryeministrit Kurti dhe Qeverisë së Republikës së Kosovës që duke planifikuar Projektligjin për buxhetin e vitit 2020 të mos e harrojnë Ligjin e pagave, implementimin e të cilit më të drejtë e presin mijëra të punësuar në sektorin publik e mes tyre edhe ata në sektorin e arsimit.
Mijëra anëtarë të SBASHK-ut besojnë fuqishëm se Kushtetuesja do të jep ndonjë vërejtje, por Ligji i pagave do të nis së zbatuari dhe pastaj Parlamenti do të bëj përmirësimet dhe nëse Ministria për Financa nuk bën planifikime buxhetore për Ligjin e pagave dhe Qeveria përkrah një ide të tillë, atëherë në tërë sistemin arsimor do të përsëritej situata e janarit të vitit të kaluar, gjegjësisht bazuar në kërkesat e anëtarësisë do të ketë veprime sindikale dhe grevë në nivel vendi nga çerdhet, institucionet e Arsimit Parauniversitar dhe në të gjitha Universitetet publike.
SBASHK-u me qëllim që çështjet të sqarohen me dialog i ka dërguar kërkesë Kryeministrit Albin Kurti për takim në afatin më të afërt të mundshëm , qoftë edhe në ditët e vikendit, ndërsa të hënën do të mbaj takim të jashtëzakonshëm konsultativ lidhur me situatën me kryetarët e nivelit sindikal komuna dhe të Universiteteve për të marrë hapa dhe veprime konkrete bazuar karshi situatës.
