Lajme

Prokuroria e cilëson si të dyshimtë vdekjen e 24-vjeçarit nga Gadimja


Publikuar më:


Në natën e 21 tetorit, në këtë vend u gjet i vdekur 24-vjeçari Shqipdon Aliu.

Pas nëntë ditësh i raportuar si i humbur, atë e gjeti një banor i Gadimes, raporton KTV.

Vendi ku 24-vjeçari u gjet i vdekur, nuk frekuentohet shpesh, pasi që janë gërmadha që kanë mbetur nga gërmimet e gurthyesit.

Madje, as punëtorët e gurëthyesit që vepron afër, nuk kanë parë e dëgjuar asgjë deri një natë më parë, kur edhe policia u njoftua se në atë pjesë ishte gjetur një trup i pajetë.

Sipas Policisë, trupi i pajetë i Shqipdon Aliut u gjet rreth orës nëntë të natës, në një gropë te gurthyesi i vjetër.

Në anën tjetër, Prokuroria e ka cilësuar si të dyshimtë vdekjen e 24-vjeçarit.

“Prokuroria Themelore në Prishtinë ka lëshuar urdhëresë për obduksion për trupin e pajetë, i cili është gjetur i vdekur në rrethana të dyshimta”, thuhet në përgjigjen e Prokurorisë.

Ky institucion nuk ka pranuar të japë asnjë sqarim nëse i riu nga Gadimja e Lipjanit ka rënë aksidentalisht në gropë apo se çfarë saktësisht ka ndodhur, derisa të dalë raporti i obduksionit.

Familjarë të të riut, shkurt kanë thënë se ende nuk dinë asgjë dhe as rrethanat e vdekjes së tij.

Shqipdon Aliu më 14 tetor ishte larguar nga shtëpia e tij, siç thonë familjarët, për të shkuar në punë. Që nga ajo kohë, 24-vjeçari nuk është parë më.

Ai u varros të martën pasdite.

To Top