Ferizaj

Miratohet Projekt-Buxheti i Komunës së Ferizajt për vitin 2021-2023


Publikuar më:


Paraditen e sotme, anëtarët e Kuvendit të Komunës, u mblodhën në seancën e rregullt të Kuvendit të Komunës, me ç’rast pika më e rëndësishme e rendit të ditës ishte propozim vendimi për miratimin e projektbuxhetit të Komunës 2021-2023.

Në fjalën e tij, përmes së cilës prezantoi objektivat ambicioze që përfshin ky projektbuxhet, i pari i Ferizajt, Agim Aliu tha se ky  është moment i veçantë, tejet i rëndësishëm, çdo vit, që ndodhet para anëtarëve  të Kuvendit të Komunës për të prezantuar dokumentin kyç të  qeverisjes lokale – miratimin e  Projekt-Buxhetit të Komunës së Ferizajt për vitin 2021-2023.

“Ferizaj ka ndryshuar. Të gjithë jemi dëshmitarë! Perspektiva ka hapur krahun qysh 3 vite më parë, plot vullnet, gatishmëri e kompetencë, vizion e ndjeshmëri për ta bërë më të mirë për bashkëqytetarët tanë. Janë pafund projekte që janë përfunduar e po kaq, në mos më shumë sesa që realizuam, presin dritën jeshile që të marrin financimin në këtë buxhet të vitit që po vjen, për t’i bërë edhe më të begata – funksionet tona shërbyese në dobi të qytetarëve”, ka thënë fillimisht Kryetari Aliu.

Numri një i qytetit të Ferizajt është shprehur se projekt-buxheti i Komunës së Ferizajt për vitin 2021-2023, pikë së pari është produkt i një kohe e rrethane të vështirë për gjithë vendin.

“ Ju tashmë e keni të njohur e të përjetuar, dëmin që pandemia i bëri jo vetëm shëndetit publik, por edhe xhepit të qytetarëve, rrjedhimisht ndikime pati edhe në planet buxhetore të komunave.

Për këtë, buxheti i vitit 2021 për Komunën e Ferizajt peshon 34,208,507.00€ apo për 1,815,126.00€ më i paktë sesa buxheti i vitit që po lëmë pas. Këto shkurtime, të domosdoshme për të mbajtur në këmbë financën publike në gjithë vendin, me patjetër na vështirësojnë punën tonë të përditshme, porse në asnjë rast nuk na zmbrapsin nga vullneti për ndryshim, nga dhjetëra e qindra projekte që ferizajasit presin t’i realizojmë.

Thënë ndryshe, është për gati 2 milionë euro më e varfër arka e Komunës, shto kësaj edhe arkëtimin e tatimit në pronë që ka shënuar rekord rënie për shkak të mospasjes së mundësisë për pagesë, së qindra familjeve ferizajase të dëmtuara nga pandemia, porse absolutisht, duke bashkëndjerë me situatën, me kapacitete të shtuara mirëplanifikimi të buxhetit lokal, jemi të vendosur të çojmë përpara agjendën e ndryshimit”, ka thënë Kryetari Aliu.

Kryetari i Kmunës së Ferizajt, Agim Aliu, ka thënë se miratimi i buxhetit të Komunës, nuk është vetëm një akt formal i ngritjes së dorës. Është mbi të gjitha vendimmarrja më e drejtpërdrejt për të mirat që i ofrohen ferizajasve për 365 ditët e ardhshme.

“Në këtë lartësi të kompetencës e përgjegjësisë publike, jam besimplotë se në secilin nga ju, ka lënë gjurmë projeksioni ynë buxhetor për ta orientuar Ferizajn në një nivel të ri, atë të konkurrueshmërisë së gjerë e lartësimit të tij në mes qendrave tjera.  Për këtë, dhjetëra anëtarë e punonjës së qeverisjes lokale kanë disajnuar, ofruar e planifikuar, projekte që prekin çdo sferë  të jetës shoqërore, pa lënë anash në asnjë çast, investimet që qytetit tonë i japin karakter shumë më të gjerë se lokal e regjional. Disa nga projektet që ky volum dokumenti përmban janë mishërim i kërkesave të kahershme, të padëgjuara më parë nga politikëbërësit, të lëna për më vonë, ngase nuk paraqisnin prioritet pune e politikëbërje. Janë pikërisht ato projekte të fushës sociale, që Ferizajt mbi të gjitha i sigurojnë një kartë të pasur institucionesh, aktivitetesh e shërbimesh sociale që transformojnë të sotmen në të ardhmen e afërt.

Projekti për ndërtimin e Shtëpisë së Pensionistëve, ndërtimi i Qendrës Rehabilituese për përdoruesit e substancave narkotike, ndërtimi i Strehimores për gratë viktima të dhunës, ndërtimi i Kompleksit për personat me nevoja të veçanta si dhe Qendrës Burimore për Fëmijët me Nevoja të Veçanta janë vetëm disa nga asetet institucionale, pasuritë e shërbimeve që Ferizaj për pak kohë do t’i ketë.  Investimet në rregullimin e vazhdueshëm deri në të fundit projekt për infrastrukturën rrugore është synimi i pakos sonë të veprimve në infrastrukturën rrugore.

Jo vetëm si qindra metra apo dhjetëra kilometra asfalt kudo në Ferizaj, por si një mundësi për të rilindur arteriet që lidhin fshatin e qytetit, qytetin në brendi e lagjet e patrajtuara për dekada.

Ndër to, është edhe përparimi i punëve në fazën e dytë të ndërtimit të Stacionit të Autobusëve në Ferizaj, një investim ky kapital e strategjik, që i jep jo vetëm frymë e funksionalitet rrugës përskaj Stacionit aktual, por edhe zhvillim pjesës periferike të qytetit”, ka potencuar Aliu.

Në fjalimin e tij para asamblistëve Kryetari Aliu, është ndalur edhe tek sektori i bujqësisë, arsimit, kulturës dhe sportit.

“Në bujqësi, përveç këmbënguljes sonë që qëndrueshëm të investojmë e përkrahim si asnjëherë më parë, bujqit e fermerët tanë përmes mekanizmit bujqësor, kemi orientuar investimet edhe në vepra tjera kapitale që lehtësojnë punën e bujqve e fermerëve tanë.Tregu i Gjelbër tërësisht i rikonstruktuar, rregullimi i trafikut me shenja ndriçuese, ndërtimi i objektit të Kompanisë “Pastërtia”, pritoret e autobusëve, vendosja e hidrantëve si dhe rregullimi i hapësirave publike pranë ndërtesave të vjetra kolektive duke përfshirë edhe rregullimin e jashtëm të  tyre, janë vetëm disa nga projektet që disa të nisura e disa gati për të nisur,  2021-ta do t’ia ofroj ferizajasve. Krahas 4 shkollave të reja që kemi nisur e po punohet vazhdimisht në ngritjen e tyre siç janë ato në Zaskok, Talinoc të Muhaxherëve dhe dy në qytet, në proces e sipër kemi edhe 2 shkolla të reja në të cilat do të ndërtohen në qytet, në mesin e tyre edhe ajo në rrugën “Sali Çeku” si dhe çerdhen e fëmijëve në rrugën “Rexhep Bislimi”, tek ish Eurogoma. Kësaj i shtojmë edhe synimin tonë për ngritjen e shkollave edhe në Zllatar, Sazli, Softaj, Rahovicë, për të cilat, nga mundësitë e kufizuara buxhetore të Komunës, do të kërkojmë mbështetjen edhe nga niveli qendror. Në këtë kuadër, më lejoni të theksoj edhe palestrat sportive që po ngrisim si dhe terrenet e komplekset tjera sportive krahas objekteve të reja dhe atyre ekzistuese shkollore.  Tri palestra sportive model të përfunduara, është bilanci i shkurtër i punës sonë për infrastrukturën sportive, shtuar kësaj edhe synimin për ngritjen edhe të dy e më shumë palestrave tjera për të vetmin qëllim, largimin e të rinjve nga dukurive devijante, duke i mundësuar pjesëmarrjen në sport, nisur edhe nga fakti kokëfortë se vendi ynë ka pjesëmarrjen më të ulët aktiv në sport.

Një komponentë e rëndësishme në këtë fushë është edhe mirëmbajtja e objekteve shkollore ekzistuese, që shkëlqyeshëm po realizohet përmes shërbimit të “Shtëpiakut” , për të vënë pastaj theksin edhe tek investimet tona të rëndësishme në këtë fushë si liga shkollore e sporteve, ditari digjital, të cilat po kështu, në vitin që do të vjen, do t’i ketë në shërbim secili prind, mësimdhënës dhe nxënës. Qeverisja aktuale lokale në harkun tre vjeçar të saj, mësoi shumë nga qytetarët, mësoi shumë për veten. Pamë sesi një qytet, një qendër regjionale si Ferizaj, ka dhe mund ta ketë gjithmonë përparimin në ecjen e çdoditshme, vetëm atëherë kur qeveriset ndershëm, pastër, me qytetarët dhe për qytetarët. Kjo është formula që bëri ecjen tonë tri vjeçare të suksesshme, pa asnjë njollë në punën e saj, e që synim kemi – siç theksova lartë, t’i japim Ferizajt e ferizajasve atë që kaherë e kanë merituar, e kanë hak, një qytet funksional, përplot projekte zhvillimi, përgjegjshmëri institucionale, gjë të cilën fare lehtë, kushdo nga ju e evidenton në projektet tona të paraqitura në këtë projektbuxhet”, ka përfunduar Kryetari Aliu.

Projekt-buxheti i vitit 2021-2023 u përkrah nga të gjitha grupet parlamentare të përfaqësuara në Kuvendin e Komunës, pavarësisht diskutimit të gjatë që u bë.

Në këtë seancë, me diskutime të shumta nga anëtarët e Kuvendit u miratuan edhe një varg vendimesh si:  ndarja e pjesës kadastrale 181-13 të zonës kadastrale në Ferizaj, ku parashihet ndërtimin e trafostacionit “TS Lagjaj e Re W”.

Poashtu në këtë mbledhje u bë shpallja e interesit të përgjithshëm të pjesëve të ngastrave kadastrale 253-2,217-2 në zonën kadastrale në Varosh si dhe propozim-vendimi për shpalljen e përgjithshme të pjesës së ngastrës kadastrale 225-3, 225-8 dhe 225-9 të zonës kadastrale në Babush.

Drejtori i Pronës, Gjeodezisë dhe Kadastrit Sabri Murseli, para anëtareve të Kuvendit poashtu propozoi edhe shpalljen e interesit të përgjithshëm për ngastrën kadastrale 1243-0, 1244-0 dhe 1245-3 të zonës kadastrale në Ferizaj.

Në këtë mbledhje u morë vendim për vendimi për dhënien në shfrytëzim të zyrave dhe bodrumit Agjencisë Shtetërore të Arkivave të Kosovës për Arkivin Ndër komunal të Ferizajt.

To Top