28,03,2024

LUFTA E UÇK-së ËSHTË E PASTËR DHE E DREJTË

Must Read

Shkruan: Alben Eshrefi

Ushtria Çlirimtare e Kosovës është institucioni i vetëm politiko-ushtarak i formuar nga populli shqiptar që me luftën e saj të drejtë e të pastër përfundimisht jetësoi kauzën dhe angazhimin kombëtar të të gjitha brezave dhe lëvizjeve kombëtare që kishin për qëllim çlirimin, lirinë dhe pavarësinë e Kosovës nga Serbia.

Luftëtarët e Ushtrisë Çlirimtare të Kosovës të grumbulluar nga të gjitha viset shqiptare, kishin një qëllim të vetëm: Të luftonin deri në vetëflijim për çlirimin e plotë të Kosovës nga Serbia.

UÇK-ja fillimisht arriti të lartësojë ndërgjegjen kombëtare në nivelin e përgjegjësisë historike, organizoi njësitë e para guerile dhe filloi aksionet e armatosura kundër policisë serbe, më tej, pas rënies heroike e të lavdishme të Adem Jasharit dhe familjes së tij, UÇK-ja u rrit me shpejtësi të jashtëzakonshme dhe u shtri pothuajse anembanë Kosovës, çliroi zona të tëra, krijoi bazat e veta strategjike, u armatos, krijoi strukturën e saj dhe përgatiti qendrat e stërvitjes duke synuar të zhvillohet duke ndjekur modelin e doktrinave të ushtrive bashkëkohore.

Institucioni i popullit shqiptar të Kosovës, UÇK-ja përgjatë verës së vitit 1998 u njoh nga SHBA-ja dhe, më pas nga Evropa, që mëpastaj u konkretizua me Konferencën Ndërkombëtare të Rambujesë për Kosovën, kur UÇK-ja u njoh ndërkombëtarisht dhe mori rolin prijës bashkarisht me gjithë përfaqësuesit tjerë shqiptarë pjesëmarrës në këtë konferencë.

Në fundin e verës së vitit 1998, UÇK-ja mori goditjen më të rëndë nga policia dhe ushtria serbe me qëllim të asgjësimit të saj të plotë, përkundër kësaj goditje tejet të fortë e mirë të planifikuar dhe organizuar, UÇK-ja u riorganizua shumë shpejt me formacione më të mëdha dhe doli edhe më e fortë se më parë.
Përfundimisht pas gjithë luftës dhe vargut të gjatë të betejave të pastërta e të drejta të UÇK-së të zhvilluara anembanë vendit nga populli shqiptar, e bindën botën liridashëshe dhe demokratike të udhëhequra nga SHBA-të të ndodhë intervenimi i NATO-s mbi caqet serbe që pa dyshim shënon mbështetjen më humane për popullin tonë dhe mundësoi UÇK-së të bashkërendojë me sulmet ajrore të NATO-s, gjithsesi se ky akt civilizues shpejtoi dhe mundësoi çlirimin dhe pavarësimin e vendit tonë.

Strategjia dhe përcaktimi politik e ushtarak i UÇK-së qe ndërtuar bashkarisht me miqtë ndërkombëtar të Kosovës, ajo bazohej në parimet universale të dokumenteve dhe konventave ndërkombëtare që rregullojnë normat e luftës dhe të drejtat e njeriut në kohë lufte, UÇK-ja kishte zbatuar me përpikëri dhe përgjegjësi këto norma, nuk kishte bërë gjenocid, nuk dëbonte e përndjekte etni të tjera jo shqiptare nga vendi, nuk kishte shfarosur, burgosur paligjshëm e torturuar, nuk vriste gra, fëmijë e njerëz të moshuar, civilë të paarmatosur, të burgosurit dhe robërit e luftës i trajtonte me humanizëm dhe në përputhje me normat ndërkombëtare të luftës, nuk kishte dhunuar seksualisht gra, nuk digjte shtëpi, nuk plaçkiste pasuritë e popullatës, sikurse kishte bërë Serbia ndaj shqiptarëve dhe etnive tjera joserbe (Jusuf Buxhovi do të mund të kontribonte dhe do të ishte e udhës të kontribonte në argumentimin dhe ofrimin e fakteve për ndëshkimin e Serbise per krimet dhe gjenocidin serb të kryer ndaj shqiptarëve në vitet e luftës në Kosovë).

Republika e Kosovës është shtet i shtetasve të vet, ndërtimi dhe forcimi i shtetit dhe paqes i takon dhe është përgjegjësi qytetare, intelektuale e atdhetare e secilit shtetas/e të moshës madhore të Republikës së Kosovës, duke dhënë kontributin qytetar, profesional e politik e publik nga secila pozitë e tyre, megjithëse si shoqëri jemi përcaktuar për pluralizëm dhe demokraci, jemi vendosur për të ndërtuar një ardhmëri të Kosovës si një vend i lirë, demokratik dhe paqedashës, andaj, është e papranueshme që për pushtet e për interesa të caktuara e të ulëta politike dhe për llogari të skenës politike e të qarqeve të ndryshme të atakohen vlerat e shenjta e sublime të popullit shqiptar, siç ngjau ditë më parë duke e sulmuar dhe kualifikuar luftën e UÇK-së me epitetet nga më të padrejtat, më të paqëndrueshmet (lexo: nga Jusuf Buxhovi) e të cilat janë në një linjë me diskursin e përdorur politik e diplomatik nga kundërshtarët e shtetësisë dhe pavarësisë së Kosovës. Mirëpo kjo do të ngjajë edhe më tej për interesa të caktuara politike derisa deputetët e Kuvendit të Kosovës nuk do të nxjerrin dhe miratojnë ligjin për Mbrojtjen e Vlerave të Luftës së Ushtrisë Çlirimtare të Kosovës.

Lavdi gjithë brezave dhe dëshmorëve të rënë për lirinë dhe pavarësinë e Kosovës!

Mirënjohje dhe përulje e përjetësishme për të gjitha vendeve mike që mbështetën vendin tonë!

Zoti e bekoftë Republikën e Kosovës!

- Advertisement -spot_img
Të fundit

Prof. Asoc. Dr. Arbresha Meha sjell inovacion dhe praktika të mira të bashkëpunimit ndërmjet akademisë dhe industrisë nga Austria në Kosovë

Në një kohë kur bashkëpunimi ndërmjet akademisë dhe industrisë po bëhet gjithnjë e më i rëndësishëm për zhvillimin e...

More Articles Like This

- Advertisement -spot_img