Lajme

Kryeministri premton përkrahje për zhvillimin e Reçanit


Publikuar më:


zkp-3_5354

Kryeministri i Republikës së Kosovës, Isa Mustafa, ka vizituar sot Reçanin dhe vendbanimet përreth këtij rajoni.

Siç njofton komunikata, fillimisht, kryeministri Mustafa ka zhvilluar një takim me qytetarë ku ishin të pranishëm qindra banorë të Reçanit dhe fshatrave tjera, përfaqësues politik të komunitetit boshnjak dhe komuniteteve tjera që banojë në këto zona, përfaqësues të fermerëve, biznesmenë dhe përfaqësues të OJQ-ve.

Më pas, kryeministri Mustafa ka shëtitur nëpër Reçan dhe ka takuar banorët si dhe ka vizituar fshatin Ljubinje, ku pas një shëtitje dhe vizite në disa pika të frekuentuara ka bashkëbiseduar me përfaqësuesit dhe banorët e këtij fshati.

Gjatë kësaj vizite, kryeministri Mustafa shoqërohej nga ministri pa portofol, Rasim Demiri, ministri i Mjedisit dhe Planifikimit Hapësinor, Ferid Agani, ministri i Bujqësisë, Pylltarisë dhe Zhvillimit Rural, Memli Krasniqi, si dhe disa zëvendësministra të resorëve të tjerë.

Gjatë takimit me qytetarët e këtyre zonave, kryeministri Isa Mustafa ka shprehur përkushtimin e Qeverisë së Kosovës për të trajtuar të gjitha kërkesat dhe shqetësimet e tyre si dhe për të ofruar përkrahje për zgjidhjen e problemeve dhe zhvillimin e këtyre zonave.

“Për ne është me rëndësi që të zhvillojmë bisedë të hapur me qytetarët tanë, t’i dëgjojmë hallet e juaja, t’i dëgjojmë kërkesat e juaja, por po ashtu të marrim edhe propozimet, vërejtjet, sugjerimet e juaja, se si te organizojmë punën më mirë, si ta organizojmë ekonomikisht këtë zonë dhe Kosovën dhe si ta forcojmë shtetin ligjor, si ta përmirësojmë arsimin, dhe si të mundësojmë që sa më shumë qytetarë të kyçen në vetëqeverisjen lokale dhe të jenë më afër pushtetit lokal. Mirëpo, të gjitha këto do t’i bëjmë në bashkëpunim me komunën, në bashkëpunim me ministritë përkatëse dhe në bashkëpunim me qytetarët”, citohet të ketë thënë kryeministri Mustafa.

Ndërsa, ministri Rasim Demiri ka falënderuar kryeministrin Mustafa për këtë vizitë.

“Kjo për ne është ditë e veçantë. Unë e falënderoj kryeministrin dhe bashkëpunëtorët e tij që i janë përgjigjur ftesës tonë. Vetë ardhja e kryeministrit këtu dëshmon se kjo Qeveri, që udhëhiqet nga Isa Mustafa, ka programin e saj, ka planin e saj, se si të lehtësohet dhe të përmirësohet jeta e të gjithë qytetarëve në Kosovë, në këtë mes edhe e qytetarëve të komunitetit boshnjak”, citohet të ketë thënë Demiri.

Në anën tjetër, gjatë debatit të zhvilluar, qytetarë të shumtë dhe përfaqësues politik kanë shtruar problemet dhe preokupimet e tyre, në të cilat kanë marr përgjigje nga kryeministri, ministrat dhe zëvendësministrat. /KosovaPress/

– See more at: http://www.kosovapress.com/sq/nacionale/kryeministri-premton-perkrahje-per-zhvillimin-e-recanit-70206/#sthash.iE7WhPXI.dpuf

Comments
To Top