Lajme

K1: Ia shpëtova jetën Kelmendit


Publikuar më:


naser_kelmendi_714534_145689_978500_148545_859734-e1461403921272

Dëshmitari nga Bosnja i koduar me shifrën K1 tha se ia ka shpëtuar jetën tri herë Naser Kelmendit.

“[Zijad] Turkoviqi ka provuar që ta vrasë 3 herë, unë ia kam shpëtuar jetën Naser Kelmendit në një dasmë në Avaz dhe kam parandaluar incidentin, sepse do të vriteshin 100 persona,” tha K1.

Zijad Turkoviq vitin e kaluar është dënuar në Bosnjë me 40 vjet burg si udhëheqës i një grupi kriminal.

Fjalët për shpëtimin e jetës së Kelmendit dëshmitari K1 i tha duke iu përgjigjur pyetjeve të Besnik Berishës, avokatit të Naser Kelmendit.

Dëshmitari nga Bosnja i  koduar si K1 ka vazhduar të jep dëshminë e tij para gjykata,për dallim nga seancat e kaluara ai tash është pyetur nga avokati Besnik Berisha  mbrojtës i Naser Kelmendit.

Berisha gjatë marrjes në pyetje të dëshmitarit u mundua që duke e ballafaquar atë me deklarimet që ka dhënë në gjykimin e Zijad Turkoviqit të ndikojë që deklarimet e tij të mos merren parasysh.

Avokati i kërkoi sqarime dëshmitarit se pse në gjykimin e Turkoviqit K1 kishte thënë se nuk e njeh Kelmendin.

“Nuk e kam përmendur Kelmendin sepse prokurorët boshnjakë më kanë bërë presion që të mos e  përmend Kelmendin dhe Fahrudin Radonçiqin. Ata më kanë thënë se nuk bën në asnjë mënyrë të përmenden Naseri dhe Fahrudini. Këta dy  e kanë udhëhequr prokurorinë edhe gjyqësinë, i kanë paguar ata,” ishte përgjigjja e dëshmitarit.

Berisha më pas i kërkoi sqarime dëshmitarit se pse në Kosovë po thotë që me Kelmendin ka punuar që nga mosha 17 vjeçare, duke pyetur se a është kjo e vërtetë.

“Po është e vërtetë,” u përgjigj dëshmitari.

Duke krahasuar dëshmitë në Bosnjë e Kosovë për Kelmendin, avokati Berisha e pyeti të koduarin me shifrën K1 a është dëshmia juaj bardh e zi?

“Atëherë kam dëshmuar për Zijad Turkoviqin dhe jo kundër Naser Kelmendit. Për Zijadin e kam thënë të vërtetën dhe atëherë kam dëshmuar çka kam dashur. [Këtu] po e them të vërtetën për Kelmendin dhe për të gjithë personat e tij,” tha dëshmitari K1.

Ai pastaj e cilësoi Kelmendin njeriun kryesor të drogës në Ballkan, duke pranuar se ka përpunuar drogën në shumë vende në Kosovë e sidomos në Pejë.

Objektet ku është bërë përpunimi i drogës K1 tha se janë shkatërruar, ose ndryshuar për të humbur gjurmët.

Avokati Berisha kundërshtoi fjalët e dëshmitarit për këto objekte, duke thënë se jeton në atë zonë, ndërsa nuk ka parë objektet për të cilat fliste dëshmitari.

Dëshmitari pastaj tregoi se me Naser Kelmendin, djemtë e tij dhe Zijad Turkoviqin ka qëndruar një muaj në burg.

K1 dëshmoi edhe në dy seancat e kaluara të këtij gjykimi.

Naser Kelmendi akuzohet për vrasje të rëndë, për krim të organizuar, blerje, posedim, shpërndarje dhe shitje të paautorizuar të narkotikëve të rrezikshëm dhe substancave psikotropike dhe prodhim e përpunim të paautorizuar të narkotikëve të rrezikshëm dhe substancave psikotropike.

Ai krahas shtetësisë kosovare e ka edhe atë boshnjake, ndërsa u arrestua nga Policia e Kosovës në majin e 2013-ës, pasi u kërkua me fletarrest ndërkombëtar nga Bosnja.

Pasi Bosnja e Kosova nuk kanë marrëdhënie diplomatike dhe as marrëveshje ekstradimi, Kelmendi është duke u gjykuar në Kosovë, por ai ka akuzë edhe në Bosnjë.

Në Bosnjë Kelmendi akuzohet për krim të organizuar, vrasje të mbetur në tentativë dhe për shitje e shpërndarje të substancave narkotike në Amerikën Latine, Turqi, Serbi, Kroaci dhe shtetet tjera të Evropës Perëndimore.

Kur iu lexua aktakuza më 16 janar, Kelmendi u deklarua i pafajshëm, ndërsa e cilësoi  aktakuzën një prodhim nga Bosnja./Kallxo.com

 

Comments
To Top