Lajme

Ish-ushtar i UÇK-së lirohet nga Gjykata e Zvicrës, kërkon azil në Francë


Publikuar më:


G. ishte shumë i befasuar kur është arrestuar në rrugët e Gjenevës këtë pranverë. Serbia është duke e kërkuar që nga viti 2012 këtë ish-ushtar të UÇK-së për ta gjykuar për terrorizëm. Ai është çuditur kur në kuadër të kësaj kërkese të ekstradimit për në Serbi është arrestuar, por gjithashtu është befasuar kur është liruar përkohësisht në fillim të këtij muaji. G, pasi që është liruar, ka vajtur direkt në Francë, ku kishte kërkuar azil para arrestimit të tij, siç raportohet në gazetën frankofone “Tribune de Genève”, njofton albinfo.ch.

Me këtë aktakuzë, me një fletarrestim ndërkombëtar dhe kërkesë për ekstradim, Zyra Federale e Drejtësisë (ZFD) kishte mandatuar policinë e Gjenevës për të ndërmarrë masat në prill për arrestimin e tij. Pas mbërritjes së tij në Champ-Dollon (burgu në Gjenevë), G. ka kundërshtuar ekstradimin e tij. ZFD-së do t’i duhet së shpejti të vendosë nëse do të pranojë transferimin apo jo. Deri atëherë, Berna ka vendosur të lirojë G., ndërsa ka kërkuar që dokumentet e tij të mbesin në duart e drejtësisë gjenevase.

Sipas aktakuzës së prokurorit publik të Serbisë, në vitin 1999 kosovari 38-vjeçar ka kidnapuar tre barinj serbë. Gjithnjë sipas këtij raporti, njofton albinfo.ch, ai më pas ka vrarë një prej tyre, me disa të shtëna në trupin e tij. “Ndërsa viktima kishte treguar shenja jete, ai e qëlloi edhe një herë”, thekson prokurori serb në parashtresat e tij të bëra pranë Gjykatës së Lartë në Vranjë.

Policia franceze kishte arrestuar G. në vitin 2014. Por, sipas avokatit të tij, Robert Assawl, ai u lirua pas disa javësh dhe është vendosur nën kontroll gjyqësor, ku më pas qeveria franceze ka refuzuar në fund kërkesën serbe. Pse? “Sepse G. tashmë është gjykuar dhe është liruar për të njëjtën vepër penale në vitin 2004 nga Gjykata Supreme e Kosovës, e cila funksiononte nën kujdesin e Kombeve të Bashkuara, shpjegon avokati i Gjenevës. Kjo është arsyeja pse Franca ka refuzuar t’ua dorëzojë ish-ushtarin e UÇK-së autoriteteve serbe”.

Autoritet serbe kanë arrestuar G. në vitin 2009, me ç‘rast u mbajt në paraburgim. Gjatë pesë muajve të tij pas hekurave, ai tregon se si pësoi përdhunime dhe tortura para se të lirohet. Aktakuza e prokurorit serb është lëshuar tre vjet më vonë.

Për avokatin Assawl, G. është viktimë e “një tërbimi të padrejtë dhe të egër të Serbisë, e cila dëshiron ta arrestojë atë, ndërsa ai është liruar përfundimisht. Sipas Konventës Evropiane, ekstradimi duhet të hidhet poshtë në mënyrë të vendosur nga Zvicra. Kërkesa e Serbisë, të cilën avokati e konsideron “krejtësisht të paligjshme dhe të padenjë për një vend evropian”, ka një qëllim politik.

Pavarësisht përfundimit të luftës, tensionet shumë të mprehta vazhdojnë në mes të Serbisë dhe Kosovës”.

Avokati mirëpret vendimin e Zyrës Federale të Drejtësisë, “e cila guxoi t’i largohet parimeve parandaluese, parime që shumë shpesh zbatohen verbërisht nga autoritetet. Ky vendim, i marrë shumë rrallë sa i përket ekstradimit siguron refuzimin e kërkesës së Serbisë”.

Comments
To Top