Ish punëtor të Fabrikës së Tubave n Ferizaj sot kanë bllokuar sallën e Kuvendit Komunal në Ferizaj dhe kërkojnë që kërkesat e tyre dhe vendimet e gjykatave relevante në Kosovë të ekzekutohen.
Pas lajmit të djeshëm se greva e ish punëtorëve të Fabrikës së Tubave në Ferizaj është pezulluar përkohësisht në Prishtinë, një numër i madh i tyre paraditen e së mërkurës kanë bllokuar sallën e Kuvendit Komunal në Ferizaj .
Sipas udhëheqësit të sindikatës së këtyre punëtorëve ata do të qëndrojnë deri sa të plotësohen 4 kërkesat të cilat tani ata i kanë vënë në hyrje të sallës.
Ata tani kanë katër kërkesa për të cilat thonë se deri në realizimin e tyre do të qëndrojnë në sallën e Kuvendit.
Kërkesat e tyre janë;
1 Kërkojnë takim urgjent me kryetarin e Kuvendit të Kosovës,Kadri Veselin dhe Kryeministrin Isa Mustafa.
- Kërkojnë nga bordi i AKP-së që më së largu deri më 10 qershor të marr vendim për lejimin e mjeteve për të bërë pagesën e borxhit në tërësi.
- Kërkojnë solidarizimin e deputetëve të nivelit qendrorë nga zona e Ferizajt.
- Kërkojnë nga kryetari i Komunës, Muharrem Svarqa, që tu ofroi kusht të domosdoshme për qëndrim deri në realizimi e kërkesave të para e sidomos me asistencë mjekësore.
”Këtu jemi ti paraqesim brengat të cilat janë vjetruar dhe ka ardhur fundi i zgjidhjes së problemit të 920 të ish punëtorëve të Fabrikës së Tubave.Ky problem është zgjidhur me vendimet e gjykatave relevante në Kosove dhe Kuvendit por deri më tani nuk është ekzekutuar.Kjo pagesë për shkak të bordit jo funksional të AKP-së nuk është kryer.Tani bordi i AKP-së është kompletuar por nuk po ekzekutohet vendimi i pagesës. Përfaqësues të AKP-së kanë deklaruar se pa marrë dritën jeshile nga Qeveria pagesa nuk mund të kryhet. Në rastin tonë nuk po zbatohet ligji” tha Ali Azemi,kryetar i sindikatës së punëtorëve.
Azemi kërkoi nga 9-të deputetët që të luajnë rolin e tyre dhe të përfaqësojnë interesat e qytetarëve të cilët i përfaqësojnë.
Me këta punëtor është takuar nënkryetari i Ferizajt, Xhavit Zarii i cili ka biseduar me këta ish punëtorë.
“ Problemi i këtyre punëtorëve është i njohur për të gjitha instancat në Kosovë. Fatkeqësisht po ndodh ajo që po ndodhë,mos respektimi i ligjeve në Kosovë. Ky nuk është i vetmi problem i mosnjohjes së ligjeve.Do të ishte mirë që me kohë të thuhej se nuk mund të realizohet kjo pagesë e jo të caktohen data e kështu të zhagitet aq shumë. Jam për respektimin e ligjit dhe vendimeve institucionale. Por këtu ne si Komunë nuk mund të bëjmë asgjë sepse nuk ekziston mundësia që ne të ndihmojmë. Edhe largimi i fundit i protestuesve nga vendi i protestës është edhe njëra prej shkeljeve të ligjit.Ne, qëndrimin e juaj këtu nuk mundë ta refuzojmë por nuk mundë të ndihmojmë asgjë” ka thënë Zariqi.
Zariqi tha se “Unë si nënkryetar mundë ti përcjellë kërkesat e juaja për këto kërkesa.Salla është e qytetarëve dhe unë nuk kam asgjë kundër.kësaj përderisa nuk vendos dikush më lartë për këtë”
Ish punëtorët ende po qëndrojnë në sallën e Kuvendit dhe po presin që dikush nga ata cilët i kanë kërkuar të takohet me ta.
