Rreth 61.5 milionë njerëz kanë të drejtë vote në këto zgjedhje, në të cilat demokratët kristianë (CDU) të Merkelit pritet të fitojnë ndërmjet 34 dhe 37% të votave, sipas sondazheve të së shtunës, transmeton Express.
Partia e Unionit Demokratik Kristian (CDU) mund të shpresojë për një fitore të ngushtë së bashku me partinë e demokratëve të lirë (FDP) ose me Partinë e të Gjelbërve.
Nga ana tjetër, Partia Socialdemokrate, e udhëhequr nga Martin Schulz, pritet të fitojë ndërmjet 21 dhe 22% të votave, që vlerësohet se është një rënie historike e mbështetjes për këtë parti.
Partia e krahut të djathtë ekstrem, Alternativa për Gjermaninë (AfD), pitet të fitojë ndërmjet 11 dhe 13% në zgjedhjet e sotme.
Në Kosovë kanë nisur debatet se kush duhet të fitojë në Gjermani pas një qëndrimi të Lëvizjes Vetëvendosje e cila bënte thirrje shqiptarëve të votojnë për parti të majta. Në kundërshtim me qëndrimin e Vetëvendosjes, Kryeministri Ramush Haradinaj tha se një pjesë e partive të majta kishin përkrahur pushtetin e Sllobodan Milloshevicit në përpjekjen e tij për të shkatërruar shqiptarët e Kosovës gjatë viteve të 90’ta.
Edhe Presidenti Hashim Thaçi doli në krah të Angela Merkel, e cila vazhdon të jetë njëra prej përkrahësve të Republikës së Kosovës.
Në krah të Merkelit dolën edhe Zëvendëskryeministri i Parë, Behgjet Pacolli dhe Kryetari i LDK’së, Isa Mustafa, i cili tha se Kancelarja gjermane është mike e Kosovës derisa qytetarëve që jetojnë në Gjermani u bëri thirrje të dalin e të votojnë. /Express/
