28,03,2024

Gecaj thotë se e njeh mirë Amerikën dhe qëndrimin e saj ndaj Kosovës, kundërshtarët e demarkacionit në LDK i quan sajesa të opozitës

Must Read

Zyrtari i LDK-së, Bajram Gecaj, ka thënë se disa deputetë të LDK-së janë bërë pjesë e pazareve me Vetëvendosjen dhe AAK-në për të rrëzuar pushtetin përmes kauzës trilluese të demarkacionit.

“Të tillët shpërndajnë mjegull e tym, sepse ju duhet ta vjedhin të vërtetën”, ka shkruar Gecaj, në një reagim të gjatë në Facebook.

Postimin e tij, mund ta lexoni të plotë më poshtë:

“DEKODUESIT” E MESAZHEVE AMERIKANE

Ajo çfarë kanë thënë institucionet e SHBA-ve, tash e sa kohë, rreth demarkacionit është e njohur dhe e qartë. Për këtë çështje nuk është lënë vend për keqinterpretime, keqkuptime, apo diçka të ngjashme.

Për këtë ishte sa konstruktiv aq edhe i qartë edhe Zëvendëspresidenti Biden në vizitën e tij të fundit në Kosovë. Ai thjeshtë rikonfirmoj atë që ishte e njohur mirë deri më tani.

Krejt kjo ishte po kështu e pa dilema dhe e njohur kaherë edhe sa i përket çështjes së Asociacionit. Atëherë prej nga paqartësia, prej nga dilema, prej nga interpretimet e çuditshme e të përçudnume? Shumë e thjeshtë. Prej atyre që nuk duan të kuptojnë, as edhe pas kësaj vizite, sepse ju del në shesh pakuptimsia e kauzës së tyre.

Prej atyre që nuk duan ta pranojnë të vërtetën sepse ju del në shesh e pavërteta e agjendës së tyre. Të tillët e dëshmuan edhe kësaj radhe se nuk janë stoik por kokëfortë, nuk janë të papërmbysur por janë bukpërmbysës. Ata shkuan edhe më larg, sepse me kauzën e padrejtë i dhanë vetes të drejtë me numrat e marrëzisë së tyre qëllimkeqe, t’i ‘dekodojnë’ mesazhet e SHBA-së në Kosovë.

Këta ‘dekodues’ të mesazheve amerikane, na tregojnë ditëve të fundit, se çfarë po mendojnë amerikanët për demarkacionin, për asociacionin, se cili qenka plani i tyre e të tjera të ngjashme. Thjeshtë të tillët shpërndajnë mjegull e tym, sepse ju duhet ta vjedhin të vërtetën.

Shtetet e Bashkuara të Amerikës dhe qëndrimin e saj ndaj Republikës së Kosovës i njoh mirë, pasi që kam punuar në kapacitetin e një analisti politik në Ambasadën Amerikane në Prishtinë për katërmbëdhjetë vite me radhë.

Megjithatë, nuk e marre guximin si disa të (keq) interpretoj deklarimet e tyre, pasi që në atë mënyrë (keq) interpretoj deklarimet e superfuqisë së vetme botërore dhe të mikut të pakontestuar të popullit dhe shtetit të Kosovës.

Ajo të cilën gati e kam të pamundur ta kuptoj (edhe pse i njoh kalkulimet e tyre) është luajtja e “lojës së dreqit” nga disa përfaqësues të partisë të cilës i takoj. Ata harrojnë (apo dëshirojnë të harrojnë) se këtyre dy çështjeve u është dhënë dimension i ri me trillime të vjetra.

Ato janë sajesa të dala nga fabrikat opozitare, me logon VV (LAV), me të vetmin qëllim për të përmbysë pushtetin e partisë të cilës ata i takojnë. Sikur harrohet e gjithë ajo dhunë e ushtruar ndaj tyre për muaj të tërë. Mos të heqim nga mendja se, duke e mjegulluar çështjen e demarkacionit, kjo opozitë qëllimin e vetëm dhe përfundimtar e ka përmbysjen e pushtetit – mos lejoni të shndërrohemi në vegla të tyre nën petkun e patriotizmit patetik.

Mos të lejojmë pra të bijmë nën kthetrat e tyre, pasi që ata vetë kanë hyrë thellë në “lloçin e gjallë” nga i cili mendojnë se nuk kanë rrugëdalje, e për këtë mundohen të na përpijnë edhe ne së bashku me ta – sepse kështu vetëm dëmtojmë interesin e partisë dhe të shtetit”, ka shkruar ai.

- Advertisement -spot_img
Të fundit

Prof. Asoc. Dr. Arbresha Meha sjell inovacion dhe praktika të mira të bashkëpunimit ndërmjet akademisë dhe industrisë nga Austria në Kosovë

Në një kohë kur bashkëpunimi ndërmjet akademisë dhe industrisë po bëhet gjithnjë e më i rëndësishëm për zhvillimin e...

More Articles Like This

- Advertisement -spot_img