Ferizaj

Ferizaj shënoi 40 vjetorin e Demonstratave të 3 Prillit 1981


Publikuar më:


Me homazhe tek varret e dëshmorëve Sherif Frangu, Rizah Matoshi dhe Afrim Abazi nisi sot manifestimi për shënimin e 40 vjetorit të Pranverës Shqiptare 1981, demonstratave gjithëpopullore që më 3 Prill të atij viti, kulmoi edhe në njërën nga vatrat e demonstratës, në Ferizaj.

Shënimi i këtij përvjetori vijoi me marshin në sheshin e qytetit dhe me vendosjen e buqetave të luleve tek pllakat përkujtimore dedikuar dëshmorëve Sherif Frangu, Rizah Matoshi dhe Afrim Abazi pranë Bibliotekës “Sadik Tafarshiku” por edhe në oborrin e Stacionit Policor në Ferizaj.

Në Akademinë dedikuar këtij përvjetori që u mbajt në Teatrin “Adriana”, me fjalë përshëndetëse të pranishmëve iu drejtua Kryesuesja e Kuvendit të Komunës, Kristina Gashi Bytyçi e cila në emër të Kryetarit të Ferizajt, Agim Aliu që po qëndron në Tiranë në vizitë zyrtare, përshëndeti këtë ngjarje.

“Sot me marshin përkujtimor “Pranvera Shqiptare 1981-2021”, përkujtojmë Demonstratat e 3 Prillit të vitit 1981 në Ferizaj, demonstrata të cilat ishin vazhdimësi e lëvizjes çlirimtare të popullit shqiptarë që datojnë që nga Lidhja e Prizrenit. Këto demonstrata kishin përfshirë tërë Kosovën, vazhdimësi e demonstratave studentore të 11 marsit, e cila kulmoi me një organizim të një proteste me përmasa të mëdha, protestë e cila lëvizi themelet e Jugosllavisë së atëhershme, e që kjo ngjarje shënonte fillimin e fundit të okupimit të trojeve shqiptare ne ish-Jugosllavi, ngjarje që ka mbetur thellë në kujtesën historike të kombit shqiptar. Në këtë demonstratë të fuqishme krahas nxënësve, studentëve u bashkangjiten edhe punetorët, dhe në përleshje me forcat policore jugosllave ranë heroikisht dëshmorët, Rizah Matoshi dhe Sherif Frangu. Poashtu, pas një viti edhe dëshmori Afrim Abazi, nxënës i shkollës së mesme teknike u vra barbarisht, duke e hedhur nga kati i pestë i ndërtesës së shërbimit policor të atëhershëm jugosllav. Këto ngjarje ishin vazhdimësi e lëvizjeve për çlirim dhe vazhduan deri tek themelimi i Ushtrisë Çlirimtare të Kosovës, ku u rreshtuan shumë të rinj e të reja, për t’i dhënë fund robërimit, deri në çlirimin e vendit tonë ku shumë prej tyre ranë dëshmorë për të mos vdekur kurrë. Jeta dhe vepra e Rizah Matoshit, Afrim Abazit dhe Sherif Frangut dhe e gjithë dëshmorëve është heroike dhe meriton një nderim të përjetshëm sepse ata dhanë gjënë më të shtrenjtë e cila nuk matet me asgjë, dhanë jetën. Mungesa e tyre fizike krijon zbrazëtirë, mirëpo lavdi i madh i tyre është gjithmonë me ne. Tani edhe pse jemi të lirë, në rrugë të mirë në realizimin e shumë proceseve si shtet i pavarur, ne asnjëherë nuk i harrojmë Dëshmorët e Kombit dhe përkulemi para tyre” tha mes tjerash Kryesuesja Gashi Bytyçi.

Me fjalë rasti dhe evokim të kujtimeve, pas një dokumentari të shkurtër që u transmetua për Demonstratat e vitit 1981, të pranishmëve iu drejtuan edhe Hysen Matoshi, Bajram Kosumi, Imri Ilazi, Hajrullah Hasani ku edhe me performimin e oktetit dhe disa pika tjera muzikore, u mbyll kjo ngjarje dedikuar përvjetorit të 40-të të Demonstratave të 3 Prillit 1981 në Ferizaj.

To Top