Vetëm gjatë vitit që lamë pas, remitencat kanë thyer rekord duke arritur në 752,4 milionë euro apo 58,7 milionë euro më shumë sesa në vitin paraprak.
Brenda periudhës 2004-2015, dërgesat e bashkatdhetarëve dërguar familjarëve në Kosovë kanë arritur në 6.3 miliardë euro, ndërsa vetëm gjatë vitit që lamë pas, remitencat kanë thyer rekord duke arritur në 752,4 milionë euro apo 58,7 milionë euro më shumë sesa në vitin paraprak.
Sipas ekspertëve të ekonomisë, brenda çdo muaji, dhjetëra miliona euro vijnë nga bashkatdhetarët që shkojnë kryesisht në konsum të përditshëm, shëndetësi por edhe sektorë ë tjerë, duke ndikuar drejtpërdrejt në qetësinë sociale të Kosovë. Sipas ekspertëve të ekonomisë, Kosova, tetë vjet pas pavarësisë, vazhdon të mbetet e varur nga diaspora.
Sipas të dhënave të Bankës Qendrore të Kosovës, nga muaji janar e deri në prill, shuma e dërgesave nga diaspora ka arritur 213 milionë euro. Mirëpo, nga 2004 e deri më 2015 nga të dhënat e Bankës Qendrore shihen se këto remitenca kanë arritur në vlerë mbi 6.3 miliardë euro, raporton gazeta “Zëri”.
Gjermania edhe më tutje mbetet shteti prej të cilit më së shumti mjete dërgohen në Kosovë, duke u pasuar nga Zvicra, Italia, Austria, Belgjika etj. Por shumica e këtyre të hyrave shkojnë në konsum të përditshëm, patundshmëri, shëndetësi, por jo edhe në investime kapitale.
Muhamet Sadiku është ekspert dhe profesor i ekonomisë. Ai ka thënë se pjesëmarrja e të hyrave nga dërgesat në bruto produktin e vendit është bukur e lartë. “Këto para kanë qenë të rëndësishme në rindërtimin e Kosovës, në konsolidimin e situatës ekonomike, në konsolidimin e tregut të Kosovës dhe në mbulimin e kërkesave të popullatës në përgjithësi”, ka thënë ai.
Sipas tij, është pak shqetësuese se 90 për qind e mjeteve shkojnë në konsum, ndërsa vetëm 10 për qind në investime. Ai thotë se duhet të bëhet një strategji për përdorimin e këtyre mjeteve me qëllim që, sipas tij, këto mjete të shërbejnë për rritjen e punësimit në Kosovë.
Ndryshe bazuar në të dhënat zyrtare të Bankës Qendrore të Kosovës shihet se gjatë vitit 2014 dërgesat nga diaspora ishin 693,7 milionë euro. Gjatë vitit 2013, dërgesat ishin në vlerë prej 620,8 milionë eurosh, gjatë vitit 2012 ishin 605,6 milionë eurosh, gjatë vitit 2011 584,8 milionë euro, gjatë vitit 2010 ishin 584,3 milionë eurosh.
