Zëvendësministri i Punëve të Brendshme, z. Nehat Mustafa, priti në takim ambasadorin e Hondurasit shkëlqesinë e tij Roberto Ochoa, i cili është ambasadori i parë nga Amerika Qendrore që është akredituar në Kosovë. Në takim ambasadori shoqërohej nga ambasadorja e Kosovës në Panama, znj.Zana Rudi.
Me këtë rast zëvendësministri Mustafa e njoftoi ambasadorin për situatën e përgjithshme të sigurisë në Kosovë, ku vlerësoi se gjendja e përgjithshme e sigurisë në vendin tonë është shumë e mirë.
“Institucionet e sigurisë në Republikën e Kosovës janë jashtëzakonisht kredibile, në bazë të vlerësime të tre viteve të fundit, Policia e Kosovës është ndër institucionet më të besueshme në Kosovë, që është dëshmi se ky institucion po punon në shërbim të qytetarëve”, theksoi zëvendësministri Mustafa.
Ndërsa ambasadori i Hondurasit shkëlqesia e tij Roberto Ochoa, theksoi se shteti i Hondurasit dhe shteti i Kosovës kanë shumë ngjashmëri për të kaluarën dhe të tashmen. Ai përgëzoi institucionet e Kosovës për progresin që kanë arritur në ngritjen e nivelit të sigurisë.
Të dy bashkëbiseduesit u dakorduan që në të ardhëm të ketë bashkëpunim konkret mes Policisë së Republikës së Kosovës dhe Policisë së Hondurasit, në projekte konkrete në shkëmbimin e përvojave mes dy vendeve.
