Rektori Bajraktari priti përfaqësuesit e Unionit të Studentëve të Kosovës

Universitetin e Shkencave të Aplikuara në Ferizaj (USHAF), e kanë vizituar sot përfaqësues të Unionit të Studentëve të Kosovës (USK), të prirë nga kryetari i Unionit Arben Mehmeti, ndërsa pjesë e këtij delegacioni ishin edhe Nehat Gashi – nënkryetar, Krenare Çerkini- nënkryetare dhe kryetarja e Asamblesë së Përgjithshme të Unionit, Alketa Mehmeti.
Përfaqësuesit e USK-së, i priti në takim rektori i UShAF, Prof. Asoc. Dr. Agron Bajraktari dhe me ta bisedoi për shumë çështje që kanë të bëjnë me studentët dhe me studimet që ofrohen në universitetet publike, e në veqanti në Universitetin e Shkencave të Aplikuara në Ferizaj.
Rektori Bajraktari vuri në theks rëndësinë e madhe që ka për institucionet e arsimit të lartë bashkëpunimi me studentët, prandaj i përgëzoi përfaqësuesit e studentëve për punën që po bëjnë.
“UShAF do të jetë gjithmonë i gatshëm që t’ju ofrojë mbështetje në vendimet tuaja lidhur me studentët tanë. Përkrahja nuk do të mungojë nga ana jonë, sepse universitetet ekzistojnë për studentët, prandaj bashkëpunimi me juve është i një rëndësie të veqantë për zhvillimin e institucionit tonë”, tha rektori Bajraktari, ndërsa iu dëshiroi punë të mbarë edhe delegatëve të UShAF-it në Unionin e Studentëve të Kosovës.

Arben Mehmeti, kryetar i USK u shpreh i kënaqur nga kjo vizitë. “Ne si përfaqësues të Unionit të Studentëve jemi të privilegjuar që sot gjetëm një përkrahje të madhe nga ana e rektorit Bajraktari për zhvillimin e USK. Patëm nderin të bisedojmë për fushat e studimeve në këtë universitet, pasi që me programet e studimit që posedon është specifik në Kosovë në krahasim me universitetet tjera”, tha ai, ndërsa theksoi se studentët e UShAF kanë mundësi të jenë më të përgatitur për tregun e punës, falë punës së rektorit Bajraktari.
Ndërsa, Lavdim Bajrami, kryetar i Parlamentit Studentor të UShAF dhe delegat në USK, i cili po ashtu ishte i pranishëm në këtë takim, theksoi rëndësinë që ka përfaqësimi i studentëve të UShAF në Unionin e Studentëve të Kosovës, ndërsa falënderoi rektorin Bajraktari për përkrahjen e vazhdueshme të studentëve dhe punën e palodhshme që po bën në të mirë të përgatitjes sa më të mirë të studentëve në profesionet e tyre.