Gratë që kanë nevojë për kontrolle gjinekologjike, tash e tutje do të kenë më të lehtë që në kuadër të Klinikës së Gjinekologjisë t’i kryejnë këto ekzaminime, pasi që kjo Klinikë është pajisur me 2 ultrazë modernë.
Përveç kësaj klinike, siç njofton Shërbimi Spitalor dhe Klinik Universitar i Kosovës me ultrazë të ri janë pajisur edhe Klinika Emergjente, ku mjekët emergjentë do ta kenë më të lehtë menaxhimin e rasteve emergjente.
“E shërbime më cilësore do marrin edhe foshnjat e porsalindura në Klinikën e Neonatologjisë, që po ashtu është pajisur me ultrazë, sikurse është pajisur edhe Klinika e Kirurgjisë Pediatrike.
Me ultrazë janë furnizuar edhe Klinika e Fiziatrisë, Klinika e Anestezionit, Shërbimi i Mjekësisë Nukleare ambulancat specialistike dhe disa klinika të tjera”, njofton Shërbimi Spitalor dhe Klinik Universitar i Kosovës.
Këto pajisje, siç njoftohet në komunikatë janë blerë pas punës intensive të menaxhmentit të Shërbimit Spitalor dhe Klinik Universitar të Kosovës, i cili si prioritet të punës së saj ka renditur furnizimin me aparaturë dhe pajisje mjekësore për njësitë e SHSKUK.
“Po ashtu, sallat operative të Klinikës së Gjinekologjisë dhe Kirurgjisë Pediatrike janë pajisur me llamba operative që më parë kanë qenë në mungesë”, thuhet tutje në komunikatë.
