Policia e Kosovës ka njoftuar se sot në fshatin Shkabaj në Prishtinë kanë realizuar planin operativ “Uzurpimet 3”, për të liruar pronat e uzurpuara.
Në njoftim të Policisë thuhet se ky plan është ndërmarrë në vazhdën e angazhimeve për lirimin e pronave të uzurpuara, konkretisht në funksion të realizimit-zbatimit të Urdhëresës së Gjykatës Themelore në Prishtinë për sekuestrimin e përkohshëm të pronës së uzurpuar në fshatin Shkabaj në Prishtinë.
“Gjatë realizimit të urdhëresës nuk është paraqitur ndonjë pengesë, përderisa objektet e sekuestruara janë shenjëzuar me njoftimin se janë nën mbikëqyrjen e policisë”, thuhet më tej në njoftim të Policisë.
