Policia e Kosovës ka dhënë detaje rreth gjetjes së trupit të pjesëtarit të dytë të saj që ishte zhdukur në ujërat e lumit Lepenc më 28 prill.
Trupi i policit Armend Trena është gjetur sot në ujërat e Lepencit në hyrje të Hanit të Elezit.
Zëdhënësi i Policisë Rajonale të Ferizajt, Agim Gashi, tha në vendin e ngjarjes së trupi i policit është gjetur rreth orës 16:45, në vendin e quajtur Ura e Fejzës.
Sipas Gashit, trupi i policit Trena është gjetur në operacionin e përbashkët të ekipeve të Agjencisë së Menaxhimit të Emergjencave, FSK-së dhe Policisë.
Sipas zëdhënësit të Policisë, trupi i policit është identifikuar nga familjarët e tij.
Trupi i policit Armend Trena është gjetur në ditën e 10-të të kërkimeve në Lepenc, 4 ditë pas gjetjes së trupit të kolegut të tij, Malsor Dashi, me të cilin me veturën zyrtare kishin rënë në lumë nga rruga magjistrale Kaçanik – Hani i Elezit.
