Trupa e aktorëve të shfaqjes “Kopraci” ka bërë gati valixhet. Nesër, aktorët ferizajas bashkë me regjisoren e shfaqjes Elmaze Nura dhe një delegacion të Teatrit, nisen në udhëtimin e tyre në Kajro të Egjiptit në hapje të Festivalit Ndërkombëtar të Teatrit Bashkëkohor dhe Eksperimental.
Publiku i këtij festivali prestigjioz ndërkombëtar, do të ndjek për dy netë me radhë, më 11 dhe 12 shtator, lojën brilante, konceptin e gjetjet e jashtëzakonshme regjisoriale dhe intrigat që shoqërojnë këtë shfaqje të përzgjedhur nga juria profesionale ndërkombëtare për pjesëmarrje në këtë festival. Entuziazmi dhe pesha e përfaqësimit tashmë ka zënë vend në mesin e aktorëve dhe regjisores Nura. Kosova përfaqësohet me këtë shfaqje në Egjipt, produksion ky i Teatrit “Adriana” në Ferizaj.
Provat e çasteve të fundit, leximet skenike e loja e aktorëve në skenën e Teatrit tonë, janë përgatitjet e fundit që po mbyllin ditën para udhëtimit. Teatri i Ferizajt “Adriana Abdullahu” për herë të parë po prezantohet me punën e produksionet e saja në arenën ndërkombëtare, kjo falë nismës së regjisores Elmaze Nura dhe financimit të plotë të kësaj ngjarje nga Komuna e Ferizajt. Aktorët e “Kopracit” padyshim janë kasti që do t’i bëjnë vendit tonë, përfaqësimin e duhur e meritor të skenës sonë teatrore në përmasat e këtij festivali prestigjioz ndërkombëtar.
