Misioni në Kosovë i Organizatës për Siguri dhe Bashkëpunim në Evropë (OSBE), në bashkëpunim me Ministrinë e Kulturës, Rinisë dhe Sporteve të enjten ka mbajtur një takim informues, qëllimi i së cilit ishte ngritja e vetëdijesimit për Zyrën Rajonale për Bashkëpunim Rinor (ZRBR) që do të themelohet së shpejti në mes strukturave rinore, organizatave të shoqërisë civile dhe institucioneve lokale.
Në këtë takim morri pjesë edhe kryetari i Komunës së Ferizajt, Muharrem Svarqa i shoqëruar edhe nga drejtori i kulturës, rinisë dhe sportit Naim Ferati, përfaqësues të ambasadës së Gjermanisë në Kosovës, drejtues të Ministrisë së Kulturës si dhe mysafirë te tjerë.
Me këtë rast numri një i qytetit të Ferizajt, Muharrem Svarqa, ka thënë se Komuna e Ferizajt do të bëjë gjithçka që është e mundur për themelimin Zyrës Rajonale për Bashkëpunim Rinor.
Ky takim synonte që të ofrojë informacione lidhur me rolin e ardhshëm të Zyrës Rajonale për Bashkëpunim Rinor në rajon, ndikimin e mundshëm që mund të ketë në rajonalizimin e organizatave rinore dhe atyre të shoqërisë civile, duke krijuar lidhje dhe projekte potenciale rajonale në të ardhmen.
