Kryetari i Nismës për Kosovë, Fatmir Limaj, ka thënë në Info Magazine të Klan Kosovës se debati i thirrur për demarkacionin, i cili pritet të zhvillohet të mërkurën, nuk është konceptuar si duhet.
Limaj tha se Qeveria moti është dashur ta dëgjojë shqetësimin e opozitës, por nuk e ka bërë një gjë të tillë.
“Ky debat nuk është konceptuar qartë, ndërsa ne si opozitë kemi dërguar listën e disa ekspertëve, por nuk kemi marrë asnjë përgjigje ende”, ka thënë Limaj.
Sipas Limajt, Qeveria e Kosovës asnjëherë nuk ka pasur sjellje normale në raport me kundërshtarët e demarkacionit.
“Gabimi ka filluar dhe gabim janë bërë hapat, duke mos pasur transparencë”.
“Qeveria normale do të duhej që shqetësimin ta merrte seriozisht dhe do të duhej të ftonte ekspertë e t’ju ofrojë mundësi për t’i paraqitur argumentet e veta dhe jo të kthehet në një garë, në një gjuhë jo shumë normale dhe jo profesionale”, tha Limaj.
