Gjashtë ditë pas vërshimeve, Suhareka me fshatra për rreth ende është në gjendje emergjente.
Rreth 50 përqind e fshatrave të kësaj komune pësuan dëme materiale. Gjatë kësaj situate u raportua për tetë persona të lënduar, të cilët kanë marrë tretman mjekësor. Aty ka ndërhyrë edhe FSK dhe Kryqi i Kuq. Ndërkohë, është vlerësuar se dëmet materiale nga kjo katastrofë natyrore kanë kaluar shifrën 6 milionë euro.
Për t’iu dalur në ndihmë sadopak banorëve të kësaj komune, deputeti Labinot Tahiri ka vendosur që ta ndaj rrogën e tij të deputetit, e cila është 1700 euro.
Tahiri ishte në vizitë te kryetari i Suharekës dhe vlerëson angazhimin e këtij të fundit për kontributin që ka dhënë si kryetar.
“Unë premtimin e mbajta dhe rrogën time e dedikova për këtë komunë”, shkruan ndër të tjera deputeti Tahiri në një status në Facebook.
