Gjatë ditës së sotme, Kryesuesja e Kuvendit të Komunës, Kristina Gashi-Bytyçi mblodhi anëtarët e Kuvendit të Komunës së Ferizajt për të diskutuar sipas agjendës legjislative, pikat e rendit të ditës të propozuara nga ekzekutivi lokal.
Pika e cila pati më së shumti diskutime ishte Raporti i Auditorit të Përgjithshëm për vitin financiar 2018. Anëtarët e KK-së nga radhët e opozitës ishin kritik duke dhënë vërejtje në shumë nga të gjeturat e këtij raporti. Shpjegimet përkitazi me çështjet e ngritura i dhanë nënkryetari i Komunës, Naim Ferati si dhe drejtorja e Financave, Sebahate Ajeti Sadiku.
Me interes të veçantë për diskutim ishte edhe pika e rendit të ditës që kishte për qëllim shpalljen e interesit të përgjithshëm të pjesës së ngastrës kadastrale 1749-6 ZK Ferizaj, zonë në të cilën gjendet aktualisht objekti i Shtëpisë së Pensionistëve e që pushteti lokal propozoi shpalljen e interesit të përgjithshëm me synimin zgjerimin e investimit nga projekti “Bashkimi i Qytetit”, saktësisht ndërtimin e rrethrrotullimit dhe ndërtimin e parkut, me ç’rast është arritur marrëveshja me shoqatën e pensionistëve, siç bëri të ditur drejtori i Pronës, Gjeodezisë dhe Kadastrit, Sabri Murseli.
Në këtë mbledhje kaluan edhe propozim-vendimet për shpalljen e interesit të përgjithshëm të disa ngastrave kadastrale në Ferizaj, në Talinovc të Jerlive, Muhoc, Talinovc të Muhaxherëve si dhe në Zonën Kadastrale në Zaskok. U mor vendim po ashtu që të nxirret në diskutim publik edhe Draft Rregullorja për Rregullimin dhe Shërbimet Komunale.
Ndërsa gjatë punimeve në mbledhjen e Kuvendit të Komunës pati edhe diskutime të tjera lidhur me Raportin e Komisionit për emërtimin e rrugëve dhe shesheve në Ferizaj. Faik Selmani, kryetar i komisionit për emërtimin e rrugëve ka njoftuar se mandati i këtij komisioni ka kaluar, ndërsa ka kërkuar nga anëtarët e Kuvendit që t’i vazhdohet mandati për punë këtij komisioni edhe pak muaj në mënyrë që të përfundohet ky proces ngase është stërzgjatur nga lëshimet dhe ankesat e shumta. Kërkesën për vazhdim të mandatit e ka përkrahur edhe drejtori i Urbanizmit dhe Mjedisit, Lulzim Aliu duke treguar se mos përfundimi i këtij procesi ka sjellë mjaft sfida. Pas diskutimeve të gjata nga anëtarët e Kuvendit edhe kjo pikë e rendit të ditës kaloi duke i dhënë afat shtesë këtij komisioni deri më 31 dhjetor 2019.
