Kryetari i Ferizajt, Agim Aliu, në Ditën Botërore të Rinisë, ka pritur në zyrën e tij reperin Gramoz Aliu, i njohur si Mozzik, për të cilën tha se është ndër të rinjtë më të suksesshëm.
Këngëtari Aliut ia bëri dhuratë albumin e tij, njofton Klan Kosova.
“Pikërisht sot, në Ditën Botërore të Rinisë, prita një nga më të suksesshmit të rinj ferizajas, që ndoqi ëndrrën e tij e zhvilloi talentin, e që sot adhurohet nga mijëra të rinj”.
“Gramoz Aliu (Mozzik) më bëri dhuratë albumin e tij më të ri muzikor, që mishëron suksesin e tij edhe jashtë kufijve tanë. Shembujt e suksesit dhe insistimi në realizimin e ëndrrave meritojnë t’i çmojmë e duartrokasim. Urime të rinj, Ditën Botërore të Rinisë! Urime Mozzik – albumin më të ri!”.
Mozzik para pak ditësh organizoi një turne për shpërndarjen e këtij albumi duke mbledhur shumë persona kur një gjë e tillë ndalohet nga institucionet në kohë të pandemisë. Kryesisht, fansat e tij që dolën ta prisnin në disa qytete të Kosovës ishin fëmijë që nuk zbatuan masat e rekomanduara për mbrojtjen e shëndetit publik.
