Do të duhen të paktën 106 vjet, derisa disa rrugë të Jezercit të asfaltohen, nëse financimi i tyre i përvitshëm shkon sikur deri tani.
Kjo pasi për projektin 5.3 milionësh, për këtë vit janë të ndara vetëm 50 mijë euro.
Asfaltimin e rrugëve të këtij fshati të Ferizajt e financon Ministria e Infrastrukturës, teksa projekti udhëhiqet nga komuna, sipas një memorandumi të nënshkruar në mars të 2019-ës, në kohën e ministrit Pal Lekaj.
Aty parashihej kryerja e punës për tri vjet. Ndërsa buxheti fillestar ishte 200 mijë euro.
Kjo temë është diskutuar edhe në Kuvendin e Kosovës, për çka ministrja e Financave, Hykmete Bajrami, e ka cilësuar shkelje të rëndë nënshkrimin e një kontrate të tillë.
