Gjykata e Sarajevës të enjten shpalli fajtor Jovan Tintorin, për krime kundër të burgosurve boshnjakë dhe kroatë, duke e dënuar me 11 vjet burg kreun serb të Komitetit të Krizës gjatë luftës në komunën e Vogosca.
Tintor ishte këshilltari i presidentit serb të Bosnjës gjatë luftës Radovan Karaxhiq dhe kreu i Partisë Demokratike Serbe të Karaxhiq në Vogosca.
Ai u shpall fajtor për tetë akuza lidhur me pjesëmarrjen në një sulm të gjerë dhe sistematik mbi popullsinë jo-serbe në Vogosca në periudhën prill- korrik 1992.
Gjykata e dënoi atë si përgjegjës për ndalime të paligjshme, tortura, rrahje dhe punën e detyruar të të burgosurve. Gjykata tha se krimet u kryen kundër një numri të madh të burgosurish boshnjakë dhe kroatë në disa kampe të burgimit në Vogosca.
“Trupi ka vendosur që i pandehuri ka kryer krim kundër njerëzimit përmes persekutimit. U përcaktua më tej, përmes një analize të provave materiale, se i pandehuri e ka kryer krimin duke marrë pjesë në një sipërmarrje të përbashkët kriminale”, tha kryetari i trupit gjykues Minka Kreho.
Kreho tha se prokuroria vërtetoi se Tintori kishte dijeni për planet e burgosjes së boshnjakëve në Vogosca dhe e kishte përshkruar territorin si “tokë serbe”.
Gjykatësi shtoi se ishte vërtetuar gjithashtu se Tintori ngriti kampin e burgut të Bunkerit dhe kishte autoritetin të vendoste se kush do të burgosej aty.
“Trupi zbuloi se Tintori kishte njohuri për abuzimin e të burgosurve dhe mund ta kishte ndaluar”, tha Kreho.
Ai ishte gjithashtu përgjegjës për ndalimin e të burgosurve në objektet e Garina të Nakina dhe Planjina Kuca, si dhe për kushtet jonjerëzore aty, shtoi gjykatësi.
Tintor u shpall fajtor edhe për vrasjen e një gruaje boshnjake shtatzënë.
Ai u lirua nga një akuzë për vrasjen e 13 të burgosurve që ishin marrë nga kampi Bunker dhe u zhdukën. Kreho tha se nuk ishte provuar se kush urdhëroi që burrat të largoheshin.
Gjykimi i shkallës së parë mund të apelohet.
