Ferizaj pa rrymë që nga mesnata

Nga mesnata, shumica e qytetit të Ferizajt, por edhe disa fshatra të kësaj komune kanë mbetur pa energji elektrike.

Ndërprerja e rrymës më së shumti telashe u ka shkaktuar biznesve. Përfaqësues të bizneseve shprehen të mllefosur për këtë gjendje, duke thënë se në këto ditë feste kur edhe qarkullimi i qytetarëve është më i madh, nuk po kanë mundësi të punojnë si duhet pasi kryesore për ta është energjia elektrike.

“Prej mesnatës është ndërprerë energjia elektrike dhe me të vërtet është vështirë pasi jemi në ditë feste dhe është shtuar numri i klientëve pasi kanë ardhur edhe bashkëatdhetarë dhe kjo gjendje tani me rrymë është një problem shumë i madh. Gjatë ditës ka qenë shumë problem, nuk kemi mundur me i përgatitë produktet, por përveç kësaj lokali është shumë i ftohtë”, tha Leona Jahiri.

“Problem shumë i madh, nga ora 1 e natës nuk ka pasur rrymë, as 20 % nuk kemi mundur me punu, nuk na kanë lajmëru fare që do të ketë ndërprerje”, tha Zylfi Xhyqeqi.

“Nuk ka rrymë nga ora 12 e natës, siç po shihet jemi duke qëndruar, klientët po hynë dhe po dalin, nuk punojnë as nxemjet, me të vërtet është shumë problem“, tha Flamur Bajraktari.

Ferizajpress ka kontaktuar zëdhënësin e KEDS-it, Viktor Buzhala i cili ka thënë se gjatë natës së mbrëmshme ka pasur një prishje në linjat 35 KW.

“Ka qenë një prishje në linjat 35 KW. Është dashur të ndërrohet Kabllo komplet. Ekipet e kanë ndërruar në kohën më të shkurtër të mundshme dhe tash konsumatoret kane energji” ka thënë Buzhala për ndërprerjen e rrymës nga orët e mbrëmjes së djeshme.

Ndërsa për ndërprerjet tjera janë të planifikuara dhe do të vazhdojnë sipas orarit të paralajmëruar për intervenime në rrjet.

Ky është orari i ndërprerjeve të planifikuara për 26 dhe 27 Dhjetor.