21 mijë kilogramë është sasia e mishit që Agjencia e Ushqimit dhe Veterinarisë ka asgjësuar nga depoja e Bashkësisë Islame të Kosovës, gjatë së mërkurës.
AUV-i ka konstatuar se ky mish i kurbaneve është i rrezikshëm për konsum dhe ka urdhëruar asgjësimin e tërë sasisë që gjendej në depon e BIK-ut, raporton KTV.
Zyrtarë të Agjencisë thonë se inspektimi i mishit është bërë me kërkesë të vetë BIK-ut.
Lamir Thaqi, zëdhënës i AUV-it, thotë se, sipas BIK-ut, kjo sasi e mishit ka ardhur nga thertoret në Kosovë dhe se ka qëndruar në depo deri në kohën e shpërndarjes te qytetarët për nder të festës së Kurban Bajramit.
Tutje, Thaqi thotë se gjatë kohës sa ka qëndruar në depo, mishi nuk ka arritur temperaturën e nevojshme ftohëse për të qenë i sigurt.
Mirëpo, hiç më larg se të martën, nga kjo depo janë dërguar katër mijë kilogramë mish në xhaminë “Pavarësia” në lagjen “Kodra e Trimave” të Prishtinës.
Nga aty, mishi u është shpërndarë banorëve, 10 ditë pas festës.
Disa banorë të kësaj lagjeje kanë rrëfyer prapa kamerës për KTV-në se mishi që u është shpërndarë ka pasur shtresa myku dhe ka kundërmuar.
Imami i kësaj xhamie, Nexhmi Hoxha, ka thënë se me të vërejtur që mishi është i prishur, e kanë larguar dhe e kanë kthyer atë në depon e BIK-ut.
Hoxha thotë se më pas i kanë lajmëruar banorët që të mos e përdorin mishin.
Kohavisioni ka provuar gjatë tërë ditës të kontaktojë më zyrtarë të Bashkësisë Islame, mirëpo asnjëri nga nuk ka qenë i qasshëm. Televizioni ka dërguar edhe pyetjet në adresë të BIK-ut, por ky institucion nuk ka kthyer përgjigje.
Në të kaluarën, BIK-u ka therur kurbanet në Hungari, siç ka thënë, për t’u ikur sëmundjeve të kafshëve në Kosovë.
Ndërsa, zëdhënësi i AUV-it thotë se nuk e dinë vjetërsinë e mishit të asgjësuar këtë të mërkurë.
