Komisioni Qendror Zgjedhor (KQZ) sot ka miratuar buxhetin rreth 6 milionë euro për organizmin e zgjedhjeve të parakohshme.
Kryetarja e KQZ-së Valdete Daka tha se kërkesën për mjete buxhetore prej 5 milionë e 698 mije e 486 euro për organizimin e zgjedhjeve, do ta dërgojnë sot në qeverinë e dorëhequr, ndërsa paralajmëroi se nëse nuk ka para, nuk mund të vazhdohet puna e këtij institucioni.
Edhe Enis Halimi, kryeshef në KQZ shfaqi shqetësimin për mungesë të mjeteve, duke thënë se pa buxhet nuk mund të fillohet asnjë procedurë në përgatitjen e zgjedhjeve të 6 tetorit.
Ndërsa, anëtarët e KQZ-së, Sami Hamiti dhe Adnan Rrustemi theksuan se këso rrethanash ishin paraqitur edhe në vitin 2017, por qeveria në atë kohë për dy ditë pati dorëzuar mjetet në KQZ.
Sipas tyre, KQZ duhet ta orientojë vëmendjen dhe energjinë për përgatitje të mira të zgjedhjeve dhe kushdo që e zvarrit çështjen buxhetore do të mbajë përgjegjësi.
Në këtë mbledhje janë caktuar edhe afatet e aktiviteteve zgjedhore, sipas të cilave fushata do të zgjasë dhjetë ditë, duke filluar nga 25 shtatori deri më 4 tetor.
Kryetarja e KQZ-së Valdete Daka theksoi se është bërë një ndryshim për periudhën e fushatës së zgjedhjeve politike, që të jetë 10 ditë, edhe tek aplikimi për regjistrim si votues jashtë Kosovës të fillojë më 30 gusht.
Ndërsa, afati i partive politike për koalicione parazgjedhore është 30 gushti deri në orën 24:00.
