Ish-deputeti i Lidhjes Demokratike të Kosovës, Adem Salihaj ka sugjeruar ambasadorin e Shteteve të Bashkuara të Amerikës, Philip Kosnett që të angazhohet t’i identifikojë figurat e pastërat dhe të njëjtat t’i vendos në krye të shtetit.
Sipas tij, ky veprim do të ishte shërbimi më i mirë që do t’ia bënin ata popullit të Kosovës.
“Asnjëherë populli i Kosovës nuk ka qenë më pak optimist për të ardhmen e tij se sa tash. Kjo bandë, e cila ka gjetur mënyrë për ta marrë pushtetin, e ka vrarë çdo shpresë të këtij populli . Korrupsioni, trafiku i drogës dhe kontrabanda, janë në kulm. Çdo segment të shtetit, deri te ata më të ndjeshmit, i ka kapur klani i bandave dhe i krimit”, ka thënë ai.
Shkrimi i plotë:
Ambasadori Kosnett dhe ambasadorët e shteteve mike duhet t’i identifikojnë figurat e pastra në Kosovë dhe t’i perkrahin ata që të vijnë në krye te shtetit. Vetëm në këtë mënyrë mund të luftohet krimi dhe korrupsioni. Ky do të ishte shërbimi më i mirë që do t’ia bënin ata popullit të Kosovës.
Situata më e rrezikshme, e cila mund ta sjell shtetin para shkatërrimit, është kur qytetarëve të tij, e veçanërisht të rinjve, nuk u intereson më se çka po ndodhë me shtetin dhe vendin e tyre, por mendojnë vetëm si të ikin nga ai vend. Në vend te dashurisë dhe respektit per vendin e tyre, ata fillojnë të kenë përbuzje dhe përçmim e neveri. Kjo ka ndodhur edhe te ne. Kosovën ua ka neveritë, jo vetëm të rinjëve, por te gjithë qytetarëve të saj, sundimi i bandave dhe krimit, duke zhvatur pamëshirshëm paratë e tyre, e bashkë me këtë, edhe shpresën dhe perspektivën jetësore të tyre.
Asnjëherë populli i Kosovës nuk ka qenë më pak optimist për të ardhmen e tij se sa tash. Kjo bandë, e cila ka gjetur mënyrë për ta marrë pushtetin, e ka vrarë çdo shpresë të këtij populli . Korrupsioni, trafiku i drogës dhe kontrabanda, janë në kulm. Çdo segment të shtetit, deri te ata më të ndjeshmit, i ka kapur klani i bandave dhe i krimit. Do të dëshiroja shumë që ambasadori i ri SHBA-ve Philip Kosnett të kyçet aktivisht në përkrahje të luftës kundër krimit dhe korrupsionit. Unë e di që e ka vështirë edhe ai, sepse bandat dhe krimi janë ne krye te institucioneve dhe ai duhet të bashkëpunojë me ta për interesa të Kosovës.
